МҮХАҮТ БОЛОН ШУТИС ГАЗРЫН ТОСНЫ БҮТЭЭГДЭХҮҮНИЙ ХӨНДЛӨНГИЙН ХЯНАЛТЫН ХАМТАРСАН ЛАБОРАТОРИ БАЙГУУЛНА
Монголын Үндэсний Худалдаа, Аж Үйлдвэрийн Танхим (МҮХАҮТ) болон Шинжлэх ухаан, технологийн их сургууль (ШУТИС) харилцан хамтын ажиллагааг өргөжүүлэх, шинжлэх ухаан, технологи, инновацыг эдийн засгийн эргэлтэд нэвтрүүлэх, хүний нөөцийн чадавхийг нэмэгдүүлэх зорилгоор хамтран ажиллах санамж бичигт гарын үсэг зурлаа.
Санамж бичгийг МҮХАҮТ-ын Ерөнхийлөгч Б.Лхагважав, ШУТИС-ийн Ректор Т.Намнан нар үзэглэн, хоёр байгууллагын хамтын ажиллагааны шинэ хуудсыг нээн дараах чиглэлүүдээр хамтран ажиллах юм.
Их сургууль–аж үйлдвэрийн уялдаа холбоог гүнзгийрүүлэх, судалгаа, технологийг эдийн засгийн эргэлтэд нэвтрүүлэх
Газрын тос болон газрын тосны бүтээгдэхүүний хөндлөнгийн хяналтын лаборатори байгуулах
ШУТИС-ийн нарийн мэргэжлийн багш, инженерүүдийг МҮХАҮТ-ын хөндлөнгийн шинжээчээр ажиллуулах
Гарааны компани, жижиг дунд үйлдвэрлэлийг дэмжих, технологи бойжуулах, хөрөнгө оруулалт татах
Бизнес эрхлэгчид, танхимын гишүүн байгууллагуудад зориулсан мэргэжлийн сургалт, хамтарсан хөтөлбөрүүдийг хэрэгжүүлэх
Шинжлэх ухааны болон бодлогын судалгаа, эрдэм шинжилгээний хурал, форум, үзэсгэлэнг хамтран зохион байгуулах
Мөн хоёр тал хамтын ажиллагааны хүрээнд Газрын тос болон газрын тосны бүтээгдэхүүний хөндлөнгийн хяналтын лаборатори байгуулах эрдэм шинжилгээ, инновацын бүтээгдэхүүн, оюуны өмчийг эдийн засгийн эргэлтэд оруулах, мөн шинэ технологийг үйлдвэрлэлд нэвтрүүлэхэд хувийн хэвшлийн оролцоог нэмэгдүүлэх чиглэлд онцгой анхаарал хандуулах юм.
ШУТИС-ийн эрдэмтэн, судлаачдын бүтээлийг бизнесийн салбарт нутагшуулах замаар Монгол Улсын эдийн засгийн тогтвортой хөгжилд хувь нэмэр оруулах зорилготой энэхүү хамтын ажиллагаа нь их сургууль–аж үйлдвэр–төрийн байгууллагын гурвалсан холбооны сайн жишээ боллоо гэдэгтэй талууд санал нэгдлээ.
Цаашлаад МҮХАҮТ болон ШУТИС-ийн хамтын ажиллагаа нь шинжлэх ухааны ололт, инновацыг бизнесийн салбарт нэвтрүүлж, Монголын эдийн засгийн хөгжилд бодит хувь нэмэр оруулах урт хугацааны стратегийн түншлэлийн эхлэл болж байгаа юм.
