ХБНГУ-ЫН НИЙСЛЭЛ БЕРЛИН ХОТНОО БОЛСОН “BAZAAR BERLIN” ОЛОН УЛСЫН ҮЗЭСГЭЛЭН АМЖИЛТТАЙ БОЛЛОО
Монголын Үндэсний Худалдаа Аж Үйлдвэрийн Танхимаас (МҮХАҮТ) ХБНГУ-ын нийслэл БЕРЛИН хотод 2025 оны 11 дүгээр сарын 5-9-ний өдрүүдэд болсон “BAZAAR BERLIN” олон улсын үзэсгэлэнд Монгол Улсын 20 бизнес эрхлэгч, 9 үндэсний үйлдвэрлэгч компаний төлөөллийг амжилттай оролцууллаа. Нээлтэд Монгол Улсаас ХБНГУ-д суугаа Элчин сайд Б.Мандахбилэг, холбогдох байгууллага болон албаны хүмүүс оролцлоо.
Үзэсгэлэнд Европын Холбооны санхүүжилтээр хэрэгжиж буй Гадаад Худалдааг Хөгжүүлэх Төсөл (ITDM) Монголын жижиг дунд үйлдвэрлэл, бизнес эрхлэгчдийг дэмжин хамтран ажиллаа.
Энэхүү үзэсгэлэн нь Дэлхийн олон орны үйлдвэрлэгч, гар урлал, жижиг дунд бизнес эрхлэгчид өөрийн бүтээгдэхүүн, үйлчилгээг танилцуулан, олон улсын худалдаа, хамтын ажиллагааг өргөжүүлэх, экспортоо нэмэгдүүлэх томоохон талбар болдог уламжлалт арга хэмжээ юм.
Монголын талаас оролцогчид үзэсгэлэнд өөрийн үйлдвэрлэсэн бараа бүтээгдэхүүнээ танилцуулж, олон улсын зах зээлд нэвтрэх, гадаадын бизнесийн төлөөллүүдтэй холбогдон, шинэ хамтын ажиллагааны боломжуудыг судалж, бүтээгдэхүүнээ борлуулан, гадаад худалдаа, зах зээлийн чиг хандлага, Европын хэрэглэгчдийн онцлог, сонирхол, сэтгэл ханамжийн талаар судалгаа хийж туршлага хуваалцсан нь онцлог байлаа.
Түүнчлэн бусад орны үйлдвэрлэгч, бизнес эрхлэгчидтэй харилцаа холбоо тогтоон, хамтран ажиллах, бүтээгдэхүүн хөгжүүлэлт, брэндийн өрсөлдөх чадварыг нэмэгдүүлэх чиглэлээр үнэ цэнтэй туршлага хуримтлуулан туршлага солилцов.
