ТӨР, ХУВИЙН ХЭВШЛИЙН ХАМТЫН АЖИЛЛАГААГ БЭХЖҮҮЛЖ, ТӨРИЙН ҮЙЛЧИЛГЭЭГ БҮРЭН ЦАХИМЖУУЛАХ ЗОРИЛГОТОЙ “E-BUSINESS 2.0” ХЭЛЭЛЦҮҮЛЭГ БОЛЖ БАЙНА

Хэлэлцүүлгийн хүрээнд бизнесийн орчныг сайжруулах, экспортыг нэмэгдүүлэх, худалдааг хөнгөвчлөх болон “E-Business” системийн хөгжлийн дараагийн шатны зорилтыг тодорхойллоо

Уулзалтад МҮХАҮТ-ын Ерөнхийлөгч Б.Лхагважав оролцож, төрийн үйлчилгээний хүнд суртлыг бууруулах, бизнесийн орчныг сайжруулах, гадаад худалдааны “нэг цонхны систем”-ийг бүрэн хэрэгжүүлэхийн чухлыг онцлов.
Мөн шинээр компани байгуулахаас татан буулгах хүртэлх бүх төрийн болон холбогдох байгууллагын үйлчилгээ, зөвшөөрлийг нэгдсэн платформд нэгтгэх “E-Business 2.0” системийн бэлтгэл ажил МҮХАҮТ-аас хийгдэж байна. Энэ нь бизнес эрхлэгчдэд хялбар, хурдан үйлчилгээ хүргэхэд чиглэжээ.
Арга хэмжээний үеэр Эдийн засгийн хөгжлийн яам, Гадаад харилцааны яам, Татварын ерөнхий газар зэрэг төрийн холбогдох байгууллагуудаас гадна Монгол Улсад суугаа Элчин сайд, Олон улсын байгууллагууд болон гадаадын хөрөнгө оруулалттай ААН-үүдийн төлөөлөл оролцсон санал авах хэлэлцүүлгийг зохион байгууллаа.

МҮХАҮТ-аас төрийн үйлчилгээний хүнд суртлыг бууруулах, шат дамжлагыг цөөрүүлэх, ялангуяа төрөөс олгодог зөвшөөрлийн тоог багасгах талаар судалгаа хийх, санал зөвлөмж боловсруулах, ажлын хэсгүүдэд ажиллах, хуулийн төсөл болон бодлогын баримт бичгүүдэд санал өгөх зэргээр идэвх санаачилгатай ажиллаж ирсэн. 2004 оноос эхлэн бизнесүүд төрийн үйлчилгээ авахад тулгарч буй бэрхшээл, хүндрэлийг тодруулах зорилготой Хүнд суртлын судалгааг явуулж, хүнд суртлын индексийг гаргаж ирсэн. 2024 оны судалгааны дүнгээр төрийн байгууллагын хүнд суртлын ерөнхий үнэлгээ 2.85 гарч, энэ нь 2021 оныхоос 0.13 нэгжээр сайжирсан дүнтэй байна. Энэхүү судалгаагаар төрийн байгууллагууд хоорондын ажлын уялдаа холбоо, бизнестэй холбоотой бодлого, хууль, дүрэм журам, шийдвэр гаргах үйл явцад бизнес эрхлэгчдийн оролцох боломж хязгаарлагдмал байна гэж үзэж бизнес эрхлэгчид муугаар үнэлжээ. Харин сүүлийн жилүүдэд төрийн үйлчилгээг цахимжуулах үйл явцын нөлөөгөөр төрийн албан хаагчдын ёс зүй, харилцаа, хандлагын үнэлгээ сайжирч байна гэж үзсэн байна.