ХЯТАДЫН ЗАХ ЗЭЭЛД НЭВТРЭХ ЧУХАЛ БОЛОМЖИЙГ ОЛГОЖ БАЙНА
БНХАУ-ын Худалдааны Яам, Шанхай хотын Ардын засгийн газар хамтран зохион байгуулдаг VIII удаагийн Хятадын Олон Улсын Импортын экспо 2025 оны 11 сарын 5-10-ны өдрүүдэд Шанхай хотноо зохион байгуулагдаж байна.
Нээлтийн ёслолд БНХАУ-ын Төрийн зөвлөлийн ерөнхий сайд Ли Чян оролцож үг хэлсэн бөгөөд олон улсын нийт 1500 гаруй хүндэт зочид төлөөлөгчид оролцлоо.
Энэ удаагийн экспод дэлхийн 155 улс орон, бүс нутаг болон олон улсын байгууллагын нийт 4108 компани оролцож, экспо нийт 430 мянган м2 талбайг хамарч түүхэндээ хамгийн том хэмжээнд хүрч, 461 шинэ бүтээгдэхүүний нээлт танилцуулагдан 80 гаруй худалдаа, хөрөнгө оруулалтын хурал, форум арга хэмжээ зохион байгуулагдаж байна.
Тус экспо нь дэлхийн компаниудад инновацийн ололт амжилтаа харуулах, экспортын гол бүтээгдэхүүнээ сурталчлах, хамтын ажиллагааны боломжийг хуваалцах, Хятадын зах зээлд нэвтрэх чухал боломжийг олгосоор байна.
Энэ жилийн үзэсгэлэнд МҮХАҮТ-ын зүгээс Монгол Улсын талбайг зохион байгуулан уул уурхайн бус экспортын онцлох бүтээгдэхүүн болох ноолуур, хуш модны самар, байгалийн гаралтай хүнс, эрүүл мэнд, гоо сайхны болон мах махан бүтээгдэхүүнийг сурталчилж мөн Монгол Улсын хөрөнгө оруулалт, худалдааны хамтын ажиллагааны боломжийг хуваалцан оролцож байна.
