“БИЗНЕСИЙН ЁС ЗҮЙ, КОМПЛАЕНСЫН ҮНДЭСНИЙ III ФОРУМ” АМЖИЛТТАЙ ЗОХИОН БАЙГУУЛАГДЛАА
Форумын нээлтэд, НҮБ-ын суурин төлөөлөгч Яаап ван Хиердэн, МҮХАҮТ-ын Ерөнхийлөгч Б.Лхагважав, болон ОУХБ-ын төлөөлөл цахимаар мэндчилгээ дэвшүүлэв.
Эдийн засаг хөгжлийн яамны Бизнесийн орчны бодлогын газрын дарга Л.Балчинлувсан оролцож УИХ-ын гишүүн, Монгол Улсын Тэргүүн шадар сайд бөгөөд Эдийн засаг, хөгжлийн сайд Н.Учралын илгээлтийг уншиж танилцууллаа.
Илгээлтэд бизнесийн ёс зүй, комплаенсын тогтолцоо нь зөвхөн ёс зүйн асуудал бус, эдийн засгийн урт хугацааны өсөлтийн баталгаа болохыг онцлон тэмдэглэв. Засгийн газар эдийн засгийн бүтцийн өөрчлөлт, төрийн оролцоог хязгаарлах, хувийн хэвшлийн оролцоог нэмэгдүүлэх бодлого баримталж буйгаа дурдав. Мөн төрийн хүнд суртлыг бууруулж, бизнесийн орчныг цахимжуулах E-Business 2.0 платформыг хөгжүүлж, “Эдийн засгийн эрх чөлөөний тухай хууль”-ийг боловсруулж буйг онцоллоо. Тэрбээр форум нь хувийн хэвшлийн ёс зүйтэй, хариуцлагатай соёлыг төлөвшүүлэх чухал алхам гэдгийг дурдаад, оролцогчдод амжилт хүслээ.
Мөн МҮХАҮТ-ын Ерөнхийлөгч Б.Лхагважав үг хэллээ. Тэрээр МҮХАҮТ нь 2010 оноос хойш НҮБ-ын “Даян дэлхийн гэрээ”, “Хүний эрхийн конвенци”, “Бизнес ба хүний эрхийн зарчмууд”-ыг гишүүн байгууллагуудад таниулж, хариуцлагатай, шударга бизнесийн орчныг төлөвшүүлэх чиглэлд тогтвортой ажиллаж ирснийг онцоллоо. 2021 онд байгуулсан Бизнесийн ёс зүйн төвөөрөө дамжуулан комплаенсын соёлыг түгээн дэлгэрүүлж буйгаа дурдав. Энэ удаагийн форум нь өмнөх хоёр форумаар олсон туршлагаа бататгаж, байгаль орчин, нийгэм, засаглалын (ESG) зарчмуудтай уялдуулан бодит хэрэгжилтэд хүргэх зорилготой гэж хэллээ.Түүнчлэн форумыг Олон Улсын Хөдөлмөрийн Байгууллагын LEADER хөтөлбөрийн хүрээнд хамтран зохион байгуулж буй нь онцлог болохыг тэмдэглэв. Цаашлаад бизнесийн байгууллагуудын нийгмийн хариуцлага, ёс зүйтэй, тогтвортой үйл ажиллагаа нь санхүүжилт, хөрөнгө оруулалтын чухал шалгуур болж буйг онцлоод, МҮХАҮТ цаашид гишүүдийнхээ дунд ёс зүйтэй бизнесийн соёлыг төлөвшүүлэх, комплаенсын тогтолцоог бэхжүүлэх чиглэлд тууштай ажиллахаа илэрхийллээ.
Форумын үеэр хариуцлагатай бизнес, байгаль орчин, нийгэм, засаглалын (БОНЗ/ESG) чиг хандлага, комплаенсын хэрэгжилт, тогтвортой хөгжлийг дэмжих бодлого, сайн туршлагын талаар илтгэл, хэлэлцүүлгүүд өрнөв.
Энэхүү арга хэмжээ нь төр, хувийн хэвшил, олон улсын байгууллагуудын хамтын ажиллагааг бэхжүүлж, ёс зүйтэй, хариуцлагатай бизнесийн соёлыг түгээн дэлгэрүүлэх зорилготой боллоо.
НҮБ-ын Даян дэлхий гэрээ нь Дэлхийн 160 гаруй улсад төвтэй, 14000 гаруй компани, 3800 бизнесийн бус байгууллага, 69 орон нутгийн сүлжээ бүхий дэлхийн хамгийн том бизнесийн салбарын тогтвортой байдлын санаачлага юм. Уг гэрээнд одоогийн байдлаар Монгол улсаас нийт 8 жижиг дунд болон томоохон аж ахуйн нэгж байгууллагууд үүрэг амлалт хүлээн элсэн ороод байна.
