“БИО-АРЬС” ГЭСЭН ОЙЛГОЛТЫГ МОНГОЛД НУТАГШУУЛАХ ЧИГЛЭЛЭЭР БОДИТ АХИЦ ГАРЧЭЭ
Европын Холбооны санхүүжилтээр Монгол Улсад хэрэгжиж буй “Ургамлын аргаар идээлсэн сарлагийн арьс шир ба арьсан бүтээгдэхүүний кластерийн био-арьс болон био-арьсан бүтээгдэхүүн үйлдвэрлэх чадавхыг бэхжүүлэх” төслийн хаалтын арга хэмжээ өнөөдөр Монголын Үндэсний Худалдаа Аж Үйлдвэрийн Танхимын Их танхимд амжилттай зохион байгуулагдлаа.
Арга хэмжээний зорилго нь төслийн хүрээнд гарсан ололт амжилт, үр дүнг танилцуулах, мөн цаашдын хамтын ажиллагаа, хөгжлийн шинэ боломжуудыг хэлэлцэхэд чиглэж байв.
Арга хэмжээнд Европын Холбоо, төрийн болон хувийн хэвшлийн төлөөлөл, салбарын мэргэжилтнүүд, олон улсын экспертүүд оролцож, сарлагийн арьсан бүтээгдэхүүний тогтвортой үйлдвэрлэл, экологийн инноваци, дэлхийн чиг хандлага зэрэг сэдвээр илтгэл тавьж, туршлага, зөвлөмжөө хуваалцсан юм.
МҮХАҮТ-ын Гүйцэтгэх захирал Ц.Магнайбаатар нээлтийн арга хэмжээнд оролцон үг хэллээ.
Тэрээр, “Сарлагийн арьс ба арьсан бүтээгдэхүүний тогтвортой үйлдвэрлэлийн кластерийн чадавхыг бэхжүүлэх төсөл Монголын хөнгөн үйлдвэрийн салбарт чухал ахиц авчирлаа. Энэхүү төсөлд оролцсон аж ахуйн нэгжүүдийн үйлдвэрлэлийн хүчин чадал дунджаар 25%-иар өсч, экспортын бэлтгэл 30%-иар сайжирсан нь бидний хамтын ажиллагааны гол үр дүн юм. Мөн арьс боловсруулах технологи, чанарын стандарт, ур чадварын сургалт, кластерийн хамтын ажиллагаа сайжирснаар Монголын сарлагийн арьсны үнэ цэнэ дэлхийд таниулагдаж, орлого, ажлын байр, бүс нутгийн хөгжилд бодит хувь нэмэр оруулж байна. Цаашид бид төслийн үр дүнг тогтвортой хөгжлийн хүрээнд үргэлжлүүлэн өргөжүүлэхийн төлөө ажиллах болно.” гэлээ.
Төслийн хэрэгжилтийн хугацаанд ургамлын аргаар идээлэх уламжлалт технологийг орчин үеийн инновацитай хослуулан хөгжүүлэх, орон нутгийн үйлдвэрлэгчдийн экологийн стандарт хангасан, нэмүү өртөг шингэсэн бүтээгдэхүүн үйлдвэрлэх чадавхыг сайжруулах, “Био-арьс” гэсэн ойлголтыг Монголд нутагшуулах чиглэлээр бодит ахиц гарсан талаар оролцогчид саналаа солилцон туршлагаа хуваалцлаа.
Мөн энэхүү төсөл нь Монгол Улсын арьс шир, гар урлал, хөнгөн үйлдвэрийн салбарыг тогтвортой хөгжүүлэх, байгальд ээлтэй үйлдвэрлэлийг дэмжих, экспортын боломжийг нэмэгдүүлэхэд чухал нөлөө үзүүллээ гэдгийг оролцогчид хэлж байлаа.
