ЖАРНААР ТООЛОГДОХ ТҮҮХ БҮТЭЭСЭН ТАНХИМЫН ШИНЭ ЖАРНЫ ТҮҮХ ЭХЭЛЛЭЭ
МҮХАҮТ-ын үүсгэн байгуулагдсаны 65 жилийн ойн баярын хүндэтгэлийн хүлээн авалт ёслол төгөлдөр болж өндөрлөлөө.
МҮХАҮТ нь үе үеийн удирдлага, мэргэжилтнүүд, гишүүн байгууллага, Төр хувийн хэвшлийн төлөөлөл зэрэг олон хүний хөдөлмөр, хичээл зүтгэлийн үр дүнд хөгжин тэлсээр байна. Монгол Улс социализмын он жилүүдэд буюу 1960-аад онд МҮХАҮТ-ыг төрийн яамны дэргэдэх институц хэлбэрээр байгуулж, дэргэд нь Гадаад худалдааны Арбитрийн үйл ажиллагааг хамт эхлүүлсэн байдаг. Үүнээс хойш 30 жилийн дараа буюу 1990 онд Монгол Улс чөлөөт зах зээлийн эдийн засагт шилжсэнээр МҮХАҮТ нь Монголын хамгийн анхны Төрийн бус байгууллага болон зохион байгуулагдаж, гадаад худалдааг дэмжих ажлыг бие даан эрхэлж ирсэн билээ.
Өнөөдөр Монголын компаниудын цар хүрээ, тоо өсч, ажил үйлчилгээний чанар, экспорт болоод импортын хэмжээ эрс нэмэгдэхийн хэрээр МҮХАҮТ-ын үүрэг оролцоо өндөр байж, гадаад ертөнцөд төдийгүй дотооддоо үйл ажиллагаагаа өргөжүүлж, хувийн хэвшлүүдээ төр, засагтай холбох гүүр болон тэднийхээ эрх ашгийг хамгаалж, дуу хоолой нь болж 21 аймагт Салбар танхимаа байгуулан, 6500 гаруй гишүүдтэй болсон байна.
Түүхт энэ өдөр ажил үйлс, хичээл зүтгэлээрээ манлайлсан МҮХАҮТ-ын хамт олон, Салбар танхимын удирдлагууд болон зарим гишүүн байгууллагынхаа захирал, ажилтнуудыг Төрийн дээд одон, медалиар шагнан урамшууллаа.
Арга хэмжээний нээлтийг МҮХАҮТ-ын Ерөнхийлөгч, Гавьяат эдийн засагч Б.Лхагважав нээн, хүрэлцэн ирсэн бүх зочид төлөөлөгчид, нийт ажилтнууддаа баярын мэндчилгээ дэвшүүлж, байгууллагын түүх уламжлалын талаар дурсан мэндчиллээ.
Монгол Улсын Ерөнхийлөгч Ухнаагийн Хүрэлсүхийн илгээлтийг Монгол улсын Ерөнхийлөгчийн тамгын газрын Төсөл хөтөлбөрийн зохицуулалт, иргэний нийгмийн бодлогын зөвлөх, хатагтай Баярсайханы Жавхлан уншиж сонордуулан МҮХАҮТ-ын Ерөнхийлөгч Б.Лхагважавд гардуулан өглөө.
Мөн Монгол Улсын Ерөнхий сайд Г.Занданшатар болон гадаад дотоод түншүүд хамтран ажилладаг байгууллагуудаас ирсэн мэндчилгээнүүдийг уншиж танилцууллаа.
МҮХАҮТ-ын Гүйцэтгэх захирал Ц.Магнайбаатар "БИЗНЕСИЙН СОРИЛТ БА БОЛОМЖ ШИНЭ ҮЕИЙН ТАНХИМ - CHAMBER 5.0" сэдвээр илтгэл тавьж, ирээдүйн зорилго, бизнесийн хөгжлийн хэтийн төлөв, шинэ үеийн танхимын 5 гол бодлогын талаар танилцуулсан нь хүрэлцэн ирсэн зочдын анхаарлыг ихээр татлаа.
Түүхт ойн баярын өдөр Монгол Улсын эдийн засгийг нуруундаа үүрч, олон арван ажлын байр бий болгон, улс орныхоо хөгжил цэцэглэлтэд үнэтэй хувь нэмрээ оруулж байдаг бизнес эрхлэгчдийн дундаас шинэхэн "Хөдөлмөрийн баатар" /Хөдөлмөрийн баатар Өгөөж чихэр боов ХХК-ийн Ерөнхий захирал С.Түмэнгэрэл/ төрсөн нь энэхүү арга хэмжээний бас нэг онцлог байлаа.
Мөн түүхт 65 жилийн ойн баярын үйл ажиллагааны үеэр МҮХАҮТ-ын дээд шагнал “Хийморь” хүндэтгэлийн одонгоор зарим хүмүүсийг шагнан урамшууллаа.
Сайн интернэйшнл ХХК-ийн захирал Баясгалангийн Амгалантуяа
Тулга Техник ХХК-ийн Ерөнхий захирал Чимэдийн Байгальмаа
Цэн газар ХХК-ийн Гүйцэтгэх захирал Хас-Эрдэнэбаатарын Төмөрбаатар
Хүннү эйр ХХК-ийн Гүйцэтгэх Захирал Пүрэвжалын Мөнхжаргал
Хэнтий аймаг дахь Худалдаа аж үйлдвэрийн танхимын менежер Дамбаагийн Даваасүрэн
Өвөрхангай аймаг дахь Худалдаа аж үйлдвэрийн танхимын дарга Бат-Очирын Ууганбаяр
Дорноговь аймаг дахь Худалдаа аж үйлдвэрийн танхимын Бизнес эрхлэгч эмэгтэйчүүдийн зөвлөлийн дарга Чулууны Уранцэцэг нар "Хийморь" хүндэтгэлийн одонг гардан авлаа.
Арга хэмжээний төгсгөлд 21 аймаг дахь Салбар танхимын дарга нар Төв танхимдаа хүндэтгэл үзүүлэн бэлэг дурсгалын зүйлс гардуулан баяр хүргэж амжилт хүслээ.
Танхимын санал санаачилгыг байнга дэмжиж, үйл ажиллагаанд нь идэвхтэй оролцож ирсэн Гишүүн байгууллагууд, Бизнес эрхлэгчид болон бизнесийг дэмжих чиглэлээр хамтран ажилладаг Төрийн болон Төрийн бус байгууллагууд, Олон улсын байгууллагууд, Мэргэжлийн холбоодод гүн талархал илэрхийлье.
