“МОНГОЛ-ЭСТОНИЙН БИЗНЕСИЙНХЭН ШИНЭ ХАМТРАГЧ, ХӨРӨНГӨ ОРУУЛАЛТАА НЭМЭГДҮҮЛНЭ
Монгол Эстонийн бизнес уулзалт өнөөдөр болж нээлтэд Бүгд Найрамдах Эстони Улсаас Монгол Улсад хавсран суугаа Онц бөгөөд Бүрэн эрхт сайд Ханнес Хансо, Эстонийн худалдаа аж үйлдвэрийн танхимын бүс нутгийн менежер Маргус Иимяарв, Монгол дахь Эстонийн Өргөмжит консул хадагтай Л.Хулан, МҮХАҮТ-ын Гүйцэтгэх захирал Ц.Магнайбаатар нар оролцон үг хэллээ.
МҮХАҮТ-ын Гүйцэтгэх захирал Ц.Магнайбаатар хэлсэн үгэндээ Монгол, Эстони хоёр улс 1991 онд дипломат харилцаа тогтоосноос хойш хоёр орны харилцаа, хамтын ажиллагаа цахим засаглал, мэдээлэл технологийн салбарт идэвхтэй өрнөж байна. 2019 онд Эстонийн И-Засаглалын академитай Монгол Улсын Засгийн газар хамтын ажиллагааны гэрээ байгуулж, цахим хөгжлийг дэмжих эрх зүйн орчныг бүрдүүлэх, И-Монгол платформыг хэрэглээнд нэвтрүүлэх чиглэлээр зөвлөх үйлчилгээ авсны үндсэн дээр өнөөдрийн байдлаар 1263 төрийн үйлчилгээ цахим руу шилжээд буй талаар болон хоёр улсын худалдааны эргэлтийн талаар товч дурдан уулзалтад оролцож буй 2 улсын аж ахуйн нэгжийн төлөөлөлд талархал илэрхийлэн, амжилт хүслээ.
Цаашид цахим засаглал, мэдээллийн технологи, хөдөө аж ахуй, хүнсний үйлдвэрлэл, сэргээгдэх эрчим хүч, боловсрол хүний нөөцийн хөгжил, цахим боловсрол зэрэг салбаруудад хамтран ажиллах боломжтой юм.
Мөн МҮХАҮТ, Эстонийн Худалдаа аж үйлдвэр танхим хооронд хамтран ажиллах санамж бичгийг үзэглэлээ.
Санамж бичгийг Эстонийн худалдаа аж үйлдвэрийн танхимын бүс нутгийн менежер Маргус Иимяарв, МҮХАҮТ-ын Гүйцэтгэх захирал Ц.Магнайбаатар нар үзэглэлээ.
Эстони улс дэлхийн хамгийн дэвшилтэт дижитал засаглал, кибер аюулгүй байдал, стартап экосистемийн загварыг бүтээж чадсан орон. Харин монгол улс байгалийн баялаг, стратегийн байршил, нээлттэй эдийн засгийн орчноороо ялгарч байна.
Монгол Эстонийн бизнес уулзалтын үеэр 2 улсын бизнес эрхлэгчдийн В2В уулзалт болж хөрөнгө оруулалт, хамтын ажиллагаа болон түншийн харилцаа тогтоолоо.
