МОНГОЛЫН БИЗНЕСИЙГ ИЛҮҮ ТОГТВОРТОЙ ӨСӨЛТИЙН ЗАМ РУУ ХӨТӨЛНӨ
Тус форумд Европ болон Монголын 300 гаруй компани, байгууллагууд эрүүл мэнд, сэргээгдэх эрчим хүч, уул уурхай , хөдөө аж ахуй, өргөн хэрэглээний бараа зэрэг чиглэлүүдийн хүрээнд хэлэлцүүлэг, сүлжээний уулзалт, бизнесийн хамтын ажиллагааг өрнүүллээ.
Мөн цэвэр эрчим хүч рүү шилжих шилжилтэд зориулан €1 тэрбум хүртэлх еврогийн санхүүжилт олгох санамж бичгийг Европын Хөрөнгө Оруулалтын Банк Монгол улсын Засгийн газартай байгуулсан нь бизнес эрхлэгчдийн анхаарлыг ихээр татлаа.
ЕХ–Монголын Бизнес ба Хөрөнгө оруулалтын форум 2 өдөр үргэлжилсэн бөгөөд тус форумд МҮХАҮТ-ын Гүйцэтгэх захирал Ц.Магнайбаатар оролцож үг хэллээ. Тэрээр, Энэхүү форум бидний хамтын зорилго болох илүү тогтвортой, ил тод, хүртээмжтэй хөрөнгө оруулалтын орчныг бүрдүүлэх үйлсийн нэгэн чухал алхам гэдгийг хэлээд, Бид итгэлцэл, инноваци, хамтын хөгжилд тулгуурлан Монголын бизнесийг илүү ухаалаг, тогтвортой өсөлтийн зам руу хөтөлнө гэдэгт итгэлтэй байна гэв. Мөн хамтын ажиллагаагаа дараах гурван бизнесийн чиглэлд гүнзгийрүүлэх боломжтой МҮХАҮТ эдгээр чиглэлд Европын хөрөнгө оруулагчид болон Монголын бизнесийн салбарын гүүр болон ажиллахад бэлэн байна гэлээ.
Нэгдүгээрт, ногоон шилжилт. Сэргээгдэх эрчим хүч, тойрог эдийн засаг, тогтвортой уул уурхайн хөгжил нь Монголын эдийн засгийн шинэ өсөлтийн хөдөлгүүр байх боломжтой. Энэ чиглэлд Европын Холбооны туршлага, хөрөнгө оруулалт, технологийн шийдэл чухал дэмжлэг болох юм.
Хоёрдугаарт, хөдөө аж ахуйн гаралтай, органик бүтээгдэхүүний экспортын төрөлжилт. Гарал үүслийн баталгаатай, чанарын өндөр стандартад нийцсэн Монголын бүтээгдэхүүнийг үе шаттайгаар Европын зах зээлд нэвтрүүлэх нь хөдөө аж ахуйн салбарын нэмүү өртгийг нэмэгдүүлж, орон нутгийн бизнесүүдийн өрсөлдөх чадварыг дээшлүүлэх ач холбогдолтой.
Гуравдугаарт, дижитал болон инновацын хамтын ажиллагаа. Монголын жижиг, дунд үйлдвэрүүд Европын холбооны дэвшилтэт технологи, инновацын туршлагаас суралцаж, цахим худалдаа болон нийлүүлэлтийн сүлжээнд холбогдох замаар шинэ бизнесийн боломжийг бий болгох юм.
Мөн форумын хүрээнд “Европын бараа бүтээгдэхүүн ба технологийн үзэсгэлэн”, “Enterpeuners' pitch", болон компани хоорондын B2B уулзалтууд зохион байгуулагдаж байна
