БИЗНЕСИЙН ХОЛБООД, ТББ-УУД ХАМТАРСАН МЭДЭГДЭЛ ГАРГАЛАА
Сүүлийн үед улс төрийн нөхцөл байдалтай холбоотойгоор бизнесийн салбар, хувийн хэвшлийн нэр хүндэд халдах, бизнесийн үйл ажиллагааг улс төрийн өнцгөөс дүгнэх хандлага газар авч байгаа нь бизнесийн орчны тогтвортой байдал, хөрөнгө оруулалт, ажлын байр, эдийн засгийн өсөлтөнд сөргөөр нөлөөлөх эрсдэлтэй болсон тул бизнесийн орчныг хамгаалах, эрсдэлийг бууруулах чиглэлд яаралтай арга хэмжээ авах шаардлагатай гэж үзэн МҮХАҮТ, бизнесийг дэмжих байгууллагууд болон салбарын холбоод хамтран бизнесийн нэр хүндийг хамгаалах зорилгоор хамтарсан мэдэгдэл гарган хэвлэлийн бага хурал зохион байгууллаа.
Хэвлэлийн бага хуралд МҮХАҮТ-ын Ерөнхийлөгч Б.Лхагважав, Уул уурхайн үндэсний ассоциацийн гүйцэтгэх захирал Г.Эрдэнэтуяа, Улаанбаатар хотын худалдааны танхимын Гүйцэтгэх захирал Б.Хаш-Эрдэнэ, Мэдээллийн технологийн нэгдсэн холбооны Гүйцэтгэх захирал Л.Хулан, Монгол дахь Америкийн худалдааны тэнхимийн гүйцэтгэх захирал О.Адъяа,“CEO” клубын ерөнхийлөгч Б.Гантулга, Монголын даатгалын зах зээлийн холбооны Ерөнхийлөгч Н.Монсор, Монголын сав баглаа үйлдвэрлэгчдийн нэгдсэн холбооны ерөнхийлөгч Б.Болдбаатар, Бизнесийн зөвлөлийн Гүйцэтгэх захирал Н.Сувд нар оролцон саналаа илэрхийлэн мэдэгдэлд нэгдэж байгаагаа илэрхийллээ.
