БНХАУ-ЫН ЛЯОНИН МУЖ-МОНГОЛ УЛСЫН ЭДИЙН ЗАСАГ, ХУДАЛДААНЫ ХАМТЫН АЖИЛЛАГААНЫ УУЛЗАЛТ БОЛЛОО
БНХАУ-ын Ляонин мужийн 6 дахь удаагийн олон улсын худалдаа, хөрөнгө оруулалтын үзэсгэлэн 2025 оны 9 сарын 25-28-ны өдрүүдэд Шэньян хотын Олон Улсын Үзэсгэлэнгийн Танхимд зохион байгуулагдлаа.
Энэхүү үзэсгэлэнг Ляонин мужийн Ардын засгийн газраас 6 дахь жилдээ зохион байгуулсан бөгөөд энэ жилийн үзэсгэлэнгийн нээлтийн үйл ажиллагаанд 50 гаруй улс орон бүс нутгийн төлөөлөгчид, БНХАУ-ын 26 мужийн төрийн байгууллагын удирдлагууд, дэлхийн топ 500 компанийн болон төрийн өмчит компаниудын төлөөлөл зэрэг 700 гаруй зочид оролцож, 21 томоохон хамтын ажиллагааны төсөл үзэглэлээ.
Мөн 18 улс орон болон БНХАУ-ын 26 муж онцлог шинэ бүтээгдэхүүн үйлчилгээ, хөрөнгө оруулалт хамтын ажиллагааны боломжийг сурталчилсан бөгөөд МҮХАҮТ анх удаа 12 аж ахуй нэгжийн бараа бүтээгдэхүүнийг тэр дундаа ноолууран бүтээгдэхүүнийг Ляонин мужийн зах зээлд танилцуулж оролцлоо.
Мөн тус үзэсгэлэнгийн үеэр /2025.09.26/ БНХАУ-ын Ляонин муж-Монгол Улсын эдийн засаг, худалдааны хамтын ажиллагааны уулзалтыг МҮХАҮТ, Ляонин мужийн Ардын Засгийн Газар, Ляонин мужийн Худалдааны танхим хамтран зохион байгууллаа.
Арга хэмжээг нээж МҮХАҮТ-ын гүйцэтгэх захирал Ц.Магнайбаатар, Сүхбаатар аймгийн засаг дарга Идэрбат, Өвөрхангай аймгийн засаг даргын орлогч Батзориг, Ляонин мужийн Ардын засгийн газрын орлогч дарга Ли Чян, Ляонин мужийн худалдааны газрын орлогч дарга Жан Вэйдунг нар үг хэллээ.
Үндсэн хурал арга хэмжээний дараа уул уурхай, дэд бүтэц, барилга, зам тээвэр зэрэг гол салбарын хүрээнд бизнес уулзалт зохион байгуулагдаж Хятадын талаас 100 гаруй, Монголын талаас 50 гаруй холбогдох байгууллага болон бизнес эрхлэгчид оролцлоо.
БНХАУ-ын Ляонин муж нь 42 сая хүн амтай, 14 хоттой, БНХАУ-ын зүүн хойд хэсэгт, Бохайн тэнгисийн эрэгт байрладаг, Зүүн хойд Азийг холбосон тээвэр ложистикийн хувьд өндөр хөгжсөн чухал гарц бөгөөд, хүнд аж үйлдвэрийн өлгий нутаг, эдийн засгийн хувьд Хятадын хойд бүсийн гол тулгуур юм.
Мөн цаг агаарын хувьд Монголтой төстэй хүйтэн сэрүүн уур амьсгалтай, Монгол үндэстэн амьдардаг онцлогтой тул ноолууран бүтээгдэхүүний хувьд тус мужийн зах зээлд нэвтрэх өргөн боломж бий. Энэ удаагийн үзэсгэлэн нь Монголын ноолууран бүтээгдэхүүнийг Ляонин мужийн зах зээлд таниулах чухал, шинэ гарцыг нээж өглөө.
