КОМПЛАЕНСЫН УДИРДЛАГА – ҮР ДҮНТЭЙ СИСТЕМ, ХЯНАЛТЫГ БИЙ БОЛГОХ НЬ СЭДЭВТ СУРГАЛТЫГ ЗОХИОН БАЙГУУЛЛАА
МҮХАҮТ-ын Бизнесийн ёс зүйн төв Австралийн худалдааны танхимтай хамтран хариуцлагатай бизнесийн практикийг хэвшүүлэх ээлжит сургалтаа зохион байгууллаа. Бизнесийн ёс зүйн төв нь хариуцлагатай, ёс зүйтэй бизнес эрхлэх хандлага, комплаенсын тогтолцоог төлөвшүүлэх чиглэлд сургалт, зөвлөх үйлчилгээ, цахим номын сангийн үйлчилгээг 2021 оноос хойш үзүүлэн ажиллаж байгаа билээ.
Австралийн худалдааны танхим, түүний гишүүн байгууллагыг чадавхижуулах сургалт, хамтарсан арга хэмжээг 2024 оноос хойш зохион байгуулж байгаа бөгөөд энэ удаа Бизнеийн ёс зүйн төвөөс КОМПЛАЕНСЫН УДИРДЛАГА – ҮР ДҮНТЭЙ СИСТЕМ, ХЯНАЛТЫГ БИЙ БОЛГОХ НЬ сэдэвт сургалтыг 2025.09.23-ны өдөр зохион байгууллаа.
Сургалтаар нь бизнесийн шударга байдал, хариуцлагатай бизнесийн тухай ойлголт, хамрах хүрээ, бизнесийн байгууллагад тулгамдаж буй асуудал, засаглал, комплаенс ын эрсдэл зэрэг онолын ойлголт болон практик туршлагыг олгоод зогсохгүй, Авлигатай тэмцэх үндэсний хөтөлбөрийн хэрэгжилтийн хүрээнд авлига, ашиг сонирхлын зөрчлөөс сэргийлэх тухай мэдээллийг хуваалцлаа.
Мөн Австралийн худалдааны танхимын Бодлого нөлөөллийн хорооны дарга С.Мандахбат “Орика Монголиа ХХК-ийн Комплаенсын удирдлагыг хэрэгжүүлсэн компанийн сайн туршлага” сэдэвт илтгэл танилцуулсан нь сургалтад оролцогчдод онолоор эзэмшсэн мэдлэгээ бататгахад тустай байлаа.
Бизнесийн ёс зүйн төв, Монголын Үндэсний Худалдаа Аж Үйлдвэрийн Танхим
Холбогдох утас: 7727 7070 (1105), 9108 0121
Цахим шуудан:businessintegrity@mongolchamber.mn
