ГАДААД ХУДАЛДААНЫ ЯАМНЫ ДЭРГЭД /1960.07.02/ХӨРӨНГӨТӨН ОРНУУДТАЙ ХАРИЛЦАХ ШИНЭ ТАНХИМ БАЙГУУЛАГДАЖ БАЙВ
Улс орны эдийн засаг, нийгэм соёлд гарсан цаг үеийн дэвшилтэт өөрчлөлтөд нийцүүлэн улсын дотоод, гадаад худалдаанд тусгайлан дэмжлэг үзүүлэх, гадаад оронтой хийх худалдаа, эдийн засгийн харилцааг өргөтгөх, дотоод худалдааг хөгжүүлэн бэхжүүлэхэд дэмжлэг туслалцаа үзүүлэх төрийн байгууллагыг шинээр үүсгэн байгуулах шаардлага 1960-аад онд бий болсон байна.
Олон улсын жишигт энэ үүргийг Эдийн засгийн танхим, Аж ахуйн танхим, Худалдааны танхим, Худалдаа аж үйлдвэрийн танхим гэх мэт нэршилтэй байгууллагууд гүйцэтгэж байв.- МАХН-ын Төв хороо, БНМАУ-ын Сайд нарын зөвлөл 1960.07.02-ны өдөр 295/194 дүгээр тогтоол гарган, БНМАУ-ын гадаад худалдаа болон улс ардын аж ахуйн салбаруудын харилцаа холбоог өргөтгөн, Олон улсын худалдаанд байр сууриа бэхжүүлэх, нэн ялангуяа хөрөнгөтөн орнуудтай худалдааны олон талт хамтын ажиллагааг өргөтгөх зорилготой БНМАУ-ын Гадаад худалдааны яамны дэргэдэх "ХУДАЛДААНЫ ТАНХИМ"ыг анх үүсгэн байгуулжээ.
