ЛЯОНИНИЙ БАРАА БҮТЭЭГДЭХҮҮНИЙ 2 ДАХЬ УДААГИЙН (2025.09.12) ҮЗЭСГЭЛЭН АРГА ХЭМЖЭЭ ЗОХИОН БАЙГУУЛАГДЛАА
БНХАУ-ын Ляонин мужийн Ардын засгийн газрын ерөнхий нарийн бичгийн дарга Гуань Яньаар ахлуулсан ажлын хэсэг Монгол улсад айлчиллаа. Эдгээр зочид төлөөлөгчид БНХАУ-ын Ляонин мужийн Шэнь Ян хотноо 9 сарын 25-28-ны өдрүүдэд зохион байгуулагдах Ляониний 6 дахь удаагийн экспод Монголын бараа бүтээгдэхүүнийг танилцуулан оролцох, БНХАУ-ын Ляонин муж, Монгол улсын эдийн засаг, худалдаа хамтын ажиллагааны бизнес уулзалт зохион байгуулах талаар МҮХАҮТ-ын удирдлагуудтай уулзалт хийв.
БНХАУ-ын Ляонин мужийн ардын засгийн газрын Ерөнхий нарийн бичгийн даргын орлогч Гуань : Ляонин муж нь дэлхийн соёлын өвд бүртгэгдсэн зургаан дурсгалт газартай. Соёлын баялаг өвтэй нутаг билээ. Газар зүйн хувьд Зүүн Хойд Азийн төв хэсэгт оршдог. Зүүн хойд Хятадын бүс нутагтаа хуурай замын болон далайн боомттой цорын ганц муж юм. МҮХАҮТ-ийн хувьд Монгол Улсын олон ААН, бизнесийн холбоодыг Ляонин мужтай холбогдох гүүр болж эрчим хүч, мал аж ахуй, хөдөө аж ахуй, цахилгаан бараа бүтээгдэхүүн, ноос ноолуур,хувцас болон бусад салбарт хамтын ажиллагаагаа гүнзгийрүүлэн хөгжүүлж эдийн засаг худалдааны салбарыг тасралтгүй ахиулна гэдэгт найдаж байна. Бидний хувьд Монгол Улсад өөрсдийн давуу талаа ашиглан ашигт малтмал, дэд бүтэц, бүтээн байгуулалт, хөдөө аж ахуйн бүтээгдэхүүний худалдаа болон бусад салбарт хөрөнгө оруулалт хийхийг илүү хүсэж байна. Мөн та бүхнийг Ляонин мужид хүрэлцэн ирэхийг урьж байна гэлээ.
МҮХАҮТ-ийн Гүйцэтгэх захирал Ц.Магнайбаатар: Монгол Улсын хувьд халаагуур хөргүүрийн тоног төхөөрөмж хэрэгцээ шаардлагатай, эрс тэс уур амьсгалтай, эрчим хүчний хомсдолтой байдаг. Та бүхний хувьд эрчим хүч бага зарцуулдаг тоног төхөөрөмж манай улсад танилцуулах гэж байгаа явдалд талархал илэрхийлье. Мөн Улаанбаатар хотод автомашины хэрэглээ өндөр байгаа энэ үед машин механизмын засвар үйлчилгээ, сэлбэг хэрэгсэл эрэлт хэрэгцээтэй байдаг. Сүүлийн үед манай улсын хувьд аюулгүй ажиллагааны стандартыг хангасан тоног төхөөрөмжүүдээр уул уурхай, аюултай химийн бодисууд болон шатахуун түгээх станцуудыг бүрэн хангах ажил чухал байна. Монгол улс болон Ляонин мужийн сүүлийн үеийн тоо баримтуудаас харахад манай хамтын ажиллагаа амжилттай хэрэгжиж явж байна. Хоёр орны бүрэн стратегийн түншлэл, эдийн засгийг сайжруулах зорилтын хүрээнд 2024 оны байдлаар худалдааны нийт эргэлт 19.1 тэрбум долларт хүрсэн. Зөвхөн Ляонин мужтай хийсэн худалдааны эргэлт нь 1 тэрбум долларт хүрсэн нь харилцаагаа өргөжүүлэх том боломж юм гэдгийг хэллээ.
Уулзалтын дараа Хүннү Шоппинг Молл худалдааны төвд нээлтээ хийсэн "Ляониний бараа бүтээгдэхүүний II удаагийн үзэсгэлэн"-д тус улсын шинэ дэвшилтэт технологийн бараа бүтээгдэхүүн, салхин цахилгаан станц, тэсрэлттэй орчинд ашиглах цахилгаан хэрэгсэл үйлдвэрлэгч, тээврийн автомашин, нүүрсний карьерийн иж бүрэн систем тоног төхөөрөмжийг үйлдвэрлэгч, барилгын шинэ заслын материал үйлдвэрлэгч зэрэг салбарын 60 гаруй аж ахуйн нэгжийн төлөөлөл оролцон бараа бүтээгдэхүүнээ танилцуулан түншийн харилцаагаа өргөжүүллээ.
