ЭВЛЭРҮҮЛЭН ЗУУЧЛАХ ТУХАЙ ХУУЛИЙН ТӨСЛИЙН ҮЗЭЛ БАРИМТЛАЛ, ҮР НӨЛӨӨНИЙ ТАЛААР ЯРИЛЦЛАА
МҮХАҮТ-ын Ерөнхийлөгчийн зөвлөх М.Сарандаваа, Монголын Олон Улсын Арбитрын Ерөнхий нарийн бичгийн дарга М.Шинэбаяр, Бизнесийн маргаан эвлэрүүлэн зуучлах төвийн Удирдах Зөвлөлийн дарга Б.Сэргэлэн нар Европын Холбооны хосолмол түншлэлийн хөтөлбөрөөс Монгол Улсын Дээд Шүүх, Германы эрх зүйн хамтын ажиллагааны сантай хамтран хэрэгжүүлж байгаа “Монгол Улсын шүүх эрх мэдлийн шинэтгэлийг үр дүнтэй хэрэгжүүлэх нь” төслийн суурин зөвлөх ноён Кристоф Копецки, төслийн зөвлөх хатагтай, хууль зүйн шинжлэх ухааны доктор Эвэлин Хеннинг нарыг /2025.08.22/ хүлээн авч, уулзлаа.
Талууд уулзалтын хөтөлбөрийн дагуу МҮХАҮТ-ын дэргэдэх Монголын Олон Улсын Арбитр, Бизнесийн маргаан эвлэрүүлэн зуучлах төвийн үйл ажиллагаа, процесс, ялангуяа эвлэрэх нөхцөл тодорхойлох, дахин хэлэлцээр хийх, хэлцэлд өөрчлөлт оруулах болон эвлэрэлийн гэрээгээр хүлээсэн үүргийн хэрэгжилтийг баталгаажуулахад Зээлийн мэдээллийн сан зэрэг санхүүгийн зөөлөн дэд бүтэцтэй хамтран ажиллах, маргалдагч талууд шүүхийн дэргэдэх болон хувийн эвлэрүүлэн зуучлалыг сонгох боломж, арга замууд, Эвлэрүүлэн зуучлах тухай хуулийн төслийн үзэл баримтлал, үр нөлөөний талаар мэргэжлийн хүрээний яриа-хэлцүүлэг өрнүүллээ.
Доктор Эвэлин Хеннинг Монголын Олон Улсын Арбитрын сүүлийн жилүүдийн үйл ажиллагааны ахиц дэвшил, ажил хэргийн нэр хүндийн өсөлт, түүнчлэн Бизнесийн маргаан эвлэрүүлэн зуучлах төвийн эвлэрэл-харилцан ойлголцолд зуучлах процессын хөгжүүлэлт, оновчлол, процесс шинэчлэлт, шинэчилсэн процессыг эхлэхийн өмнө авбал зохих арга хэмжээний төлөвлөлт, хэрэгжилтийг сайшааж, онцлон ач холбогдол өглөө. Тэрээр ХБНГУ-ын Франкфурт хотын шүүхийн шүүгч-эвлэрүүлэн зуучлагч, Сингапурын Олон Улсын Арбитрын арбитрч, Германы хамтын ажиллагааны олон улсын байгууллагын БНХАУ дахь төлөөлөгчийн газарт тус тус ажиллаж байсан ХБНГУ-ын Хоссе мужийн Хууль зүйн яамны түшмэл юм.
БМЭЗТөвийн Удирдах Зөвлөлийн дарга ноён Б.Сэргэлэн бизнесийн маргааны эвлэрэлд зуучлах мэргэжлийн үйлчилгээний тусламжтайгаар талууд маргааны хүрээнд хэлэлцээр хийх, учирсан ба учирч болох санхүүгийн ба бусад эрсдлийг үнэлэх, харилцан тохирох нөхцөл-шийдэлд ашиглах, эдгээрээр хязгаарлагдахгүй ADR арга замуудыг улам бүр хөгжүүлэх зорилттой ажиллаж байгаа маань Монгол Улс дахь хөрөнгө оруулалтын өгөөжийг нэмэгдүүлэх, Монгол Улс итгэл даасан хөрөнгө хүлээн авагчаар хүлээн зөвшөөрөгдөхөд хувь нэмэр оруулах зорилгоор төвийн үйл ажиллагааг бодлогын өргөн цараатай удирдаж байгаагаа танилцуулахад Төслийн суурин зөвлөх Кристоф Копецки маргаан шийдвэрлэх соёлын хөгжлийг эдийн засгийн үр нөлөөтэй уялдуулан ажиллах стратеги нь содон шийдэл хэмээн тэмдэглэсэн байна. Ноён Кристоф Копецки сүүлийн 10 жилд Төв азийн орнуудад хосолмол түншлэлийг хөтөлбөрийг үр дүнтэй хэрэгжүүлсэн арвин туршлагатай нэгэн.
Уулзалтын төгсгөлд МҮХАҮТ-ын Ерөнхийлөгчийн зөвлөх М.Сарандаваа Монголын Үндэсний Худалдаа Аж Үйлдвэрийн Танхим нь хуульд заасан зорилт, бүрэн эрхийнхээ хүрээнд БМЭЗТөвийн үйл ажиллагааны хөгжүүлэлт, бизнесийн маргааны эвлэрэл-ойлголцолд зуучлах үйлчилгээний чанар, үр нөлөөний ахицыг дэмжин ажиллахаа илэрхийлэв.
Уулзалтад МҮХАТ-ын Ерөнхийлөгчийн ажлын албаны менежер хатагтай Р.Оюун-Эрдэнэ, Монголын Олон Улсын Арбитрын мэргэжилтэн Ө.Бат-Эрдэнэ, Бизнесийн маргаан эвлэрүүлэн зуучлах төвийн ерөнхий медиатор Ч.Баяртуул, “Монгол Улсын шүүх эрх мэдлийн шинэтгэлийг үр дүнтэй хэрэгжүүлэх нь” төслийн суурийн зөвлөхийн туслах С.Одончимэг, тус төслийн ажилтан Б.Батжаргал нар оролцлоо.
