ПОЛЬШ УЛСЫН АЖ АХУЙ НЭГЖТЭЙ ХАМТРАН АЖИЛЛАХ ТААТАЙ НӨХЦӨЛ БҮРДЭЖ БАЙНА
Монгол Улсаас Бүгд Найрамдах Польш Улсад суугаа Элчин сайдын яамтай хамтран “Монгол-Польшийн бизнес уулзалт”-ыг өнөөдөр Гадаад харилцааны яаман дээр зохион байгууллаа.
Уулзалтаар талууд өөрийн орны эдийн засгийн нөхцөл байдал, гадаад худалдаа хөрөнгө оруулалтын талаар мэдээлэл солилцсон бөгөөд Польш Улсын Засгийн газрын дэмжлэгтэйгээр үйл ажиллагаа явуулдаг Экспортын Зээлийн Даатгалын Корпораци (KUKE S.A.)-ийн төлөөлөгч Катарзина Ковальска илтгэл тавьсан бөгөөд 2025 оны 10 дугаар сарын 01-ний өдрөөс Польш Улсын аж ахуй нэгжтэй хамтран ажиллах хүсэлтэй Монгол Улсын аж ахуй нэгжүүдийн зээлжих эрх нэмэгдэж, хүү буурч зээлийн таатай нөхцөл байдал үүсэж байгааг мэдэгдэв.
Тус корпораци нь экспорт, гадаад худалдаа, хөрөнгө оруулалтын чиглэлээр даатгалын үйлчилгээ үзүүлдэг үндэсний байгууллага бөгөөд Польшийн компаниудын олон улсын зах зээлд өрсөлдөх чадварыг нэмэгдүүлэх, гадаад түншлэл, хөрөнгө оруулалтыг даатгалын хамгаалалтаар хангах замаар дэмжлэг үзүүлдэг. Мөн экспортын зээл, төлбөрийн эрсдэлээс хамгаалах, хөрөнгө оруулалтын баталгаа гаргах зэрэг өргөн хүрээний бүтээгдэхүүн, үйлчилгээг санал болгодог.
Тус уулзалтад МҮХАҮТ-ын Ерөнхий нарийн бичгийн дарга Б.Саруул, Бүгд Найрамдах Польш Улсын санхүү, даатгал, нягтлан бодох бүртгэл, гоо сайхны, уламжлалт анагаах ухааны, мах, махан бүтээгдэхүүн, боловсролын, зар сурталчилгаа, медиа, хууль, эрх зүй болон соёл урлагийн салбарын нийт 12, Монгол Улсын талаас 30 гаруй аж ахуй нэгжийн төлөөлөл оролцон саналаа солилцов.
