ТӨСӨЛД ШАЛГАРСАН ЭМЭГТЭЙ БИЗНЕС ЭРХЛЭГЧИД САНХҮҮГИЙН ТЭТГЭЛЭГ, СУРГАЛТ ЗӨВЛӨГӨӨН, ТЕХНИКИЙН ТУСЛАЛЦААГ АВНА
Энэхүү салбар хуралдааны панелист МҮХАҮТ-ын Ерөнхий нарийн бичгийн дарга Б.Саруул: Энэхүү салбар хуралдаанаар зөвхөн бизнес эрхлэгч эмэгтэйчүүдийн асуудлыг хэлэлцэхээс гадна, тэдний эдийн засагт оруулж буй бодит хувь нэмрийг тодотгон харуулж, цаашдын дижитал шилжилт, олон улсын худалдаанд эмэгтэйчүүдийн оролцоог өргөжүүлэхэд чиглэж буйгаараа онцлог ач холбогдолтой юм. Монгол Усад өнөөдөр бизнесийн удирдах түвшинд ажиллаж буй компанийн удирдлагын 40 орчим хувь нь эмэгтэйчүүд байна. Мөн 199 мянга орчим хувиараа бизнес эрхлэгчдийн 42 хувийг эмэгтэйчүүд эзэлж байгаа нь тэдний эдийн засагт оруулж буй идэвхтэй оролцоог илтгэж байна гэдгийг хэллээ.
Мөн хуралдааны үеэр Дэлхийн худалдааны байгууллага (ДХБ), Олон улсын худалдааны төв (ОУХТ)-ийн хамтран хэрэгжүүлж буй “Цахим эдийн засаг дахь эмэгтэй экспортлогчдыг дэмжих сан” (Women Exporters in the Digital Economy – WEIDE) төслийн сонгон шалгаруулалтад шалгарсан 50 бизнес эрхлэгч эмэгтэйд өнөөдөр Улаанбаатар хотноо болсон Дэлхийн бизнес эрхлэгч эмэгтэйчүүдийн чуулга уулзалтын салбар хуралдаан дээр "Сертификат"-ыг нь гардуулан өгч, төслийг албан ёсоор эхлүүлсэн арга хэмжээ боллоо.
Дэлхийн худалдааны байгууллага (ДХБ), Олон улсын худалдааны төв (ОУХТ)-ийн хамтран хэрэгжүүлж буй “Цахим эдийн засаг дахь эмэгтэй экспортлогчдыг дэмжих сан” (Women Exporters in the Digital Economy – WEIDE) төслийн сонгон шалгаруулалтад дэлхийн 600 гаруй байгууллагаас мэдүүлэг ирүүлснээс Монголын Үндэсний Худалдаа Аж Үйлдвэрийн Танхим шалгарч, Монгол Улс төслийг хэрэгжүүлэх анхны дөрвөн улсын нэгээр (Монгол Улс, Доминиканы Бүгд Найрамдах Улс, Иорданы Хашимитын Хаант Улс, Холбооны Бүгд Найрамдах Нигери Улс) тодорсон.
Энэхүү төслийн хүрээнд бизнес эрхлэгч эмэгтэйчүүдийг чадавхжуулах, санхүүгийн дэмжлэг үзүүлэх зорилготой хамтын ажиллагааны санамж бичигт гарын үсэг зурах ёслолын ажиллагаа 2025 оны 6 дугаар сарын 4-ний өдөр Женев хотноо болж ДХБ-ын Ерөнхий захирал Нгози Оконжо-Ивеала, ОУХТ-ийн Гүйцэтгэх захирал Памела Күүк-Хамильтон, Монголын Үндэсний Худалдаа Аж Үйлдвэрийн Танхимын Ерөнхийлөгч нар оролцсон юм.
"Сертификат"-ыг нь гардуулах ёслолын арга хэмжээнд Монгол Улсаас Женев дэх Байнгын төлөөлөгч, Элчин сайд Д.Гэрэлмаа, ДХБ-ын Жендэр ба худалдааны газрын дарга Аноуш дер Богхассаин, ОУХТ-ийн SheTrades санаачлагын дарга бөгөөд WEIDE сангийн Ерөнхий зохицуулагч Жюдит Фессехаие, МҮХАҮТ-ын Ерөнхий нарийн бичгийн дарга Б.Саруул нар оролцон гардуулж өглөө.
Тус төсөл нь хоёр төрлийн санхүүжилт олгохоор төлөвлөсөн.
“Discovery Grant” буюу гарааны бизнесийн санхүүжилтээр гурван мянган америк доллар
“Booster Grant” буюу өргөжин тэлэхэд бэлэн болсон бизнест гучин мянган америк доллар
Энэ төсөл эхэлснээр шалгарсан бизнес эрхлэгч эмэгтэйчүүд тус сангаас 2 жилийн хугацаанд 1 сая ам.долларын өртөг бүхий санхүүгийн тэтгэлэг, сургалт зөвлөгөөн, техникийн туслалцааг авна.
Төсөлд шалгарсан нийт бизнес эрхлэгч эмэгтэйчүүддээ бизнесийн их амжилт хүсье!
Салбар хуралдааныг зохион байгуулагчид
