ОЛОН УЛСЫН БИЗНЕС ЭРХЛЭГЧ ЭМЭГТЭЙЧҮҮДИЙН БАРАА БҮТЭЭГДЭХҮҮНИЙ ҮЗЭСГЭЛЭН НЭЭЛТ БОЛЛОО

Монгол Улсын Ерөнхийлөгч Ухнаагийн Хүрэлсүхийн ивээл дор зохион байгуулагдаж байгаа “Дэлхийн бизнес эрхлэгч эмэгтэйчүүдийн чуулга уулзалт"-ын хүрээнд "Олон улсын бизнес эрхлэгч эмэгтэйчүүдийн бараа бүтээгдэхүүний үзэсгэлэн худалдаа" Сүхбаатарын талбайд 3 өдрийн турш үргэлжиллээ.

Үзэсгэлэнгийн нээлтэд ГХЯ -ны Олон Улсын Худалдаа Эдийн Засгийн Газрын дэд захирал Д.Золзаяа, МҮХАҮТ-ын дэд захирал Ч. Баттулга, МҮХАҮТ-ын Ерөнхий нарийн бичгийн дарга Б.Саруул, ЖДҮГ-ын Бодлого зохицуулалтын газрын дарга А. Гэрэлзаяа нар оролцон үг хэллээ.

Энэ удаагийн олон улсын үзэсгэлэнд оролцож буй аж ахуйн нэгжийн 90 гаруй хувь нь эмэгтэй бизнес эрхлэгчид бөгөөд тэд өөрсдийн салбар салбартаа үйлдвэрлэл, үйлчилгээ. шинэ техник технологи ашиглан гаргасан бараа бүтээгдэхүүнээ брэнд болгон хөгжүүлж чадсан, бизнесийн салбартаа манлайлж буй баялаг бүтээгч, хөрөнгө оруулагчид юм.

Энэхүү үзэсгэлэнд дотоодын 112 бизнес эрхлэгч, аж ахуйн нэгж байгууллагааас гадна ОХУ, БНСУ, БНАВУ, Туркменистан зэрэг улсаас бизнес эрхлэгч нийт 20 гаруй ААН өөрсдийн үйлдвэрлэсэн бараа бүтээгдэхүүнээрээ танилцуулахын зэрэгцээ түншийн харилцаагаа өргөжүүлэн оролцож байна.

“Дэлхийн бизнес эрхлэгч эмэгтэйчүүдийн чуулга уулзалт" "Олон улсын бизнес эрхлэгч эмэгтэйчүүдийн бараа бүтээгдэхүүний үзэсгэлэн худалдаа" арга хэмжээнд оролцон, дэмжин хамтран ажилласан бүх аж ахуйн нэгж, хувь хүмүүст талархал илэрхийлэн цаашдын бизнесийн үйл ажиллагаанд нь амжилт хүсье!