ХАНБОГД КАШМЕР ХХК-ИЙН СҮЛЖМЭЛ БОЛОН БЭЛЭН БҮТЭЭГДЭХҮҮНИЙ ҮЙЛДВЭРТЭЙ ТАНИЛЦЛАА
АНУ-ын Конгресс, Сенатын гишүүд, ITC SheTrades санаачилгын дарга Жудит Фессехаие, Дэлхийн худалдааны байгууллагын (ДХБ) худалдаа ба хүйсийн асуудал хариуцсан газрын дарга Аноуш Дэ Богоссиан, НҮБ-ын Суурин зохицуулагч Яап ван нар МҮХАҮТ-ын Спонсор гишүүн Ханбогд кашмер ХХК-ийн үйл ажиллагаатай танилцлаа.
Ханбогд кашмер ХХК нь байгаль орчинд ээлтэй, тогтвортой үйлдвэрлэлийг дэмжихийн зэрэгцээ, дадлага туршлагатай мэргэжилтэн, инженер техникийн ажилтнууд, шинэ дэвшилтэт техник, технологийг тасралтгүй нэвтрүүлж, малчдын хоршоодыг дэмжих, мал аж ахуйн тогтвортой байдлыг хангах, малчдын орлогыг нэмэгдүүлэх, уур амьсгалын өөрчлөлтийн сорилтыг даван туулах, үржлийн чанарыг сайжруулж буй талаараа танилцуулан өөрийн үйлдвэрийн бараа бүтээгдэхүүний дээжээс бэлэглэлээ. Мөн Сүхбаатар аймгаас нарийн ноолуурын чиглэлийн улаан ямааны 300 орчим тоо толгой эр ишиг авч, Өмнөговь аймгийн Номгон сумын Лусын сэрчим малчны хоршоонд бэлэглэсэн байна. Ингэж нутаг сэлгэн нийлүүлснээр цөм сүргийн чанар сайжирч, ноолуурын ширхэгтийн чанар болон тогтвортой үйлдвэрлэлийн хэмжээ нэмэгдэхэд чухал түлхэц болж дотоод, гадаад олон улсын зах зээлд өрсөлдөх чадвар улам сайжирдаг гэж тус компанийн ерөнхий захирал Ч.Ганцэцэг ярьлаа.
Мөн уулзалтын үеэр МҮХАҮТ-ын Ерөнхий нарийн бичгийн дарга Б.Саруул танхимын үйл ажиллагаа болон АНУ руу экспортыг нэмэгдүүлэх талаар саналаа солилцлоо.
