МҮХАҮТ болон Үйлдвэрчиний Эвлэлийн холбоо хамтын ажиллагааны чиглэлээ хэлэлцлээ
Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав, Гүйцэтгэх захирал Ц.Магнайбаатар нар Монголын Үйлдвэрчний эвлэлийн холбооны Ерөнхийлөгч Э.Тамир, МТХГТА-ны ҮЭ-ийн холбооны дарга М.Болдсайхан, МАЗ-ын ҮЭ-ийн холбооны дарга Б.Цэрэнпүрэв нартай уулзаж хөдөлмөр эрхлэлт, цалин хөлс, тарифын хэлэлцээр, гадаад ажиллах хүч, татвар, нийгмийн даатгал, ҮЭ-ийн эрх зүйн зохицуулалт зэрэг олон чухал асуудлаар байр сууриа солилцов.
МҮЭХ-ны Ерөнхийлөгч Э.Тамир төрөөс баримтлах цалин хөлсний бодлогыг илүү боловсронгуй болгох, бүтээмжид суурилсан загварыг хувийн хэвшилд нэвтрүүлэх, тарифын гэрээний ач холбогдлыг онцлон тэмдэглэв. Түүнчлэн нийгмийн түншлэлийн соёлыг хөгжүүлэх, дотоодын аж ахуйн нэгжүүдийг тендер, концессод оролцуулах нөхцөлийг бүрдүүлэх шаардлагатайг хөндлөө.
МҮХАҮТ-ын Ерөнхийлөгч Б.Лхагважав хөдөлмөрийн зах зээлд ажил олгогчийн үүрэг, хариуцлага өсөн нэмэгдэж байгааг тэмдэглээд, хөдөлмөрийн капиталын үнэ цэнийг нэмэгдүүлэх, хөдөлмөрийн чөлөөт эдийн засгийн философийг нэвтрүүлэх нь зүйтэй хэмээн байр сууриа илэрхийлэв.
Талууд хамтын ажиллагааны хүрээг тодорхойлох, нийгмийн түншлэлийн тогтолцоог улам боловсронгуй болгоход чиглэсэн тодорхой алхмуудыг цаашид хамтран хэрэгжүүлэх эрмэлзэлтэй байгаагаа илэрхийлсэн үр дүнтэй уулзалт боллоо.
эх сурвалж: Монголын Үйлдвэрчний Эвлэлийн Холбоо
