ТАЖИКСТАН-МОНГОЛЫН БИЗНЕС ФОРУМ БОЛЛОО
Тажикистан-Монголын бизнес форумын нээлтэд Тажикистан улсын Худалдаа, эдийн засгийн хөгжлийн сайд Завкизода Завки Амин, МҮХАҮТ-ын Ерөнхийлөгч Б.Лхагважав, Бүгд Найрамдах Тажикистан Улсын Засгийн газрын дэргэдэх Экспортын агентлагийн захирал Бахриддин Сироджиддинзода, Монгол Улсын Ерөнхийлөгчийн Үйлдвэр, Үйлчилгээний бодлогын зөвлөх Ч. Даваабаяр, Бүгд Найрамдах Тажикистан Улсын Худалдаа аж үйлдвэрийн танхимын Дэд Ерөнхийлөгч Хайдар Раджабзода, Монгол Улсын Ерөнхийлөгчийн төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан нар оролцон үг хэллээ.
МҮХАҮТ-ын Ерөнхийлөгч Б.Лхагважав хэлсэн үгэндээ Монгол-Тажикистаны бизнес форум нь хоёр улсын худалдаа, эдийн засгийн хамтын ажиллагааг өргөжүүлэх, хөрөнгө оруулалтыг нэмэгдүүлэх, бизнес эрхлэгчдэд шинэ түнштэй холбоо тогтоох, зах зээлээ тэлэх, гэрээ хэлэлцээр хийх боломжийг бүрдүүлэх зорилгоор төрийн дээд хэмжээний айлчлалын хүрээнд зохион байгуулагдаж байгаагаараа онцлог болж байна. Тажикистан улс нь дотоодын түүхий эд нөөц боломжоо ашиглан усан цахилгаан станцаар дотоодын эрчим хүчнийхээ үйлдвэрлэлийн дийлэнххувийг бүрдүүлж байгаагаараа онцлог улс. Монгол Улс усан цахилгаан станц болон Сэргээгдэх эрчим ба тархмал эх үүсвэрийг хөгжүүлэх чиглэлээр мега хөгжлийн төслүүдийг гадаадын хөрөнгө оруулалт, төр хувийн хэвшлийн түншлэлээр хэрэгжүүлэхээр ажиллаж байна гэлээ.
Монгол Улс, Тажикистан улс хооронд 2024 оны жилийн эцсийн байдлаар нийт 207.0 мянган.америк.долларын худалдаа хийсэн байна.
Монгол Улсаас Тажикистан улс руу нийт 136.0 мянган.америк.долларын экспорт хийснээс 132.0 мянган.ам.долларын үнийн дүн бүхий хонь, ямааны мах экспортолсон бол, 71.0 мянган.америк.долларын хүнсний бараа бүтээгдэхүүн болон тун хэлбэрт савласан эмийг Тажикистан улсаас импортолсон байна.
Оролцогчид хоёр улсын худалдаа, эдийн засгийн хамтын ажиллагааг тэлэх, хөрөнгө оруулалтыг нэмэгдүүлэхэд хоёр талын танхимуудын хамтын ажиллагаа, үүрэг оролцоо ихээхэн чухал юм гэдгийг хэлж байв.
