“Киргиз-Монголын Бизнес форум” зохион байгуулагдлаа

Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Киргизстан Улсад хийж буй төрийн айлчлалын хүрээнд “Киргиз-Монголын Бизнес форум” зохиогдож, Монгол Улсын Шадар Сайд С.Амарсайхан, Бүгд Найрамдах Киргизстан Улсын Сайд нарын танхимын орлогч дарга Э.Ж Байсалов нар нээж үг хэллээ.

Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Төсөл хөтөлбөрийн зохицуулалт, иргэний нийгмийн бодлогын зөвлөх Б.Жавхлан нар “Хүнсний хувьсгал” болон “Цагаан алт” үндэсний хөдөлгөөний үйл ажиллагааны талаар илтгэл танилцуулав.

Мөн хоёр улсаас хүнс, хөдөө аж ахуй, хөнгөн үйлдвэр, худалдаа үйлчилгээ, уул уурхай, барилга, мэдээллийн технологи, эрчим хүч, боловсрол, банк санхүү зэрэг бүх л салбарын 150 гаруй төлөөлөл оролцлоо. Бүгд Найрамдах Киргиз Улсын эдийн засаг сүүлийн дөрвөн жил тогтвортой өсөж байгаа бөгөөд, худалдаа үйлчилгээ, уул уурхай, хөдөө аж ахуй, үйлдвэрлэл зэрэг нь эдийн засгийн голлох салбарууд болоод буй.

Уламжлалт нүүдлийн мал аж ахуйтай Монгол, Киргиз хоёр улс нийгэм, эдийн засаг, хүнс, хөдөө аж ахуй зэрэг бүхий л салбарт хамтран ажиллахад таатай. Ингэхдээ мах, махан болон сүү сүүн бүтээгдэхүүн, ноос ноолуур зэргийг харилцан худалдаалах боломжтой юм.

Бизнес форумын үеэр хоёр талын Худалдаа Аж Үйлдвэрийн танхим болон хүнс, банк санхүү, мэдээллийн технологийн компаниуд Санамж бичиг байгуулан гарын үсэг зурж, хамтын ажиллагааг эхлүүллээ.

Форумыг хааж МҮХАҮТ-ын Ерөнхийлөгч Б.Лхагважав, Киргизстаны ХАҮТ-ын Ерөнхийлөгчийн үүргийг түр орлон гүйцэтгэгч Т.Т.Таалайбекова нар үг хэлэн, бизнес эрхлэгчдэд амжилт хүслээ.

эх сурвалж: https://hunsniihuvisgal.mn/post/105671