Бүгд Найрамдах Киргиз Улсын Өндөр Технологийн Паркын үйл ажиллагаатай танилцлаа
Тус парк нь Киргиз Улсын “Өндөр технологийн паркийн тухай” хуулийн хүрээнд үйл ажиллагаа явуулдаг бөгөөд орчин үеийн технологи, программ хангамж, аутсорсинг, IT үйлчилгээний чиглэлээр үйл ажиллагаа эрхэлж буй компаниудыг дэмжих зорилготой юм.
ӨТП нь “виртуаль чөлөөт бүс” хэлбэрээр ажилладаг бөгөөд оршин суугч хуулийн этгээд, хувь хүмүүст зориулсан татварын тусгай дэглэм бүхий таатай орчныг бүрдүүлсэн.
Үүнд:
Нэмэгдсэн өртгийн албан татвар (НӨАТ) – 0%
Орлогын албан татвар – 0%
Хувь хүний орлогын албан татвар – 5% (ердийн 10%-ийн оронд)
Нийгмийн даатгалын шимтгэл – буурсан хувьтайгаар тооцогдоно
Орлогын 1%-ийг ӨТП-ийн хөгжлийн санд төвлөрүүлдэг ажээ.
Тус байгууллага нь дотоодын болон гадаадын IT компаниудын хувьд бизнес инкубац, хүний нөөцийн чадавх бэхжүүлэх сургалт, зөвлөх үйлчилгээ, хамтын ажиллагааны хөтөлбөрүүдээр дамжуулан системтэй дэмжлэг үзүүлдэг.
2020 оны байдлаар ӨТП-ийн оршин суугч компаниудын нийт орлого 15 сая ам.долларт хүрч, экспортын чиг баримжаатай үйл ажиллагаа нь АНУ, Их Британи, Япон, Казахстан, ОХУ зэрэг 30 гаруй улсыг хамарсан. Өнөөдрийн байдлаар 380 гаруй компани, 2500 гаруй ажилтан ӨТП-ийн хүрээнд ажиллаж байна.
ӨТП-ийн стратегийн зорилго нь:
Киргиз Улсыг бүс нутгийн программ хангамжийн хөгжлийн төв болгох;
Дотоодын технологийн бизнесийн экспортын чадавхыг нэмэгдүүлэх;
2030 он гэхэд 50,000 хүртэл ажлын байр бий болгох юм.
Өндөр Технологийн Парк нь төр–хувийн хэвшлийн түншлэл, олон улсын байгууллагуудтай хамтын ажиллагаагаа тэлж, шинэлэг бизнесийг төрүүлэх, тогтвортой өсөлтийг хангах замаар Киргиз Улсын технологийн салбарын тэргүүлэгч тоглогчдын нэг байж, амжилттай үйл ажиллагаагаа явуулж байна.
