МҮХАҮТ, РЯЗАНЬ МУЖТАЙ ХАМТРАН АЖИЛЛАНА
“Монгол-Хятад-Оросын Худалдаа, Аж Үйлдвэрийн Танхимуудын XVIII удаагийн гурван талт чуулган нь гурван улсын танхимуудын хамтын ажиллагааны хүрээнд жил бүр ээлжлэн зохион байгуулагддаг уламжлалт арга хэмжээ бөгөөд МҮХАҮТ, ОХУ-ын Дорнод Сибирийн Худалдаа Аж Үйлдвэрийн Танхимтай хамтран ОХУ-ын Эрхүү хотноо зохион байгуулж байна.
Энэ удаагийн чуулганд цахим худалдааны сүлжээ, эрүүл мэнд, аялал жуулчлал, хүнс хөдөө аж ахуй, хөнгөн үйлдвэрлэл, барилга, барилгын материал үйлдвэрлэл, нүүрс, болон хийн бүтээгдэхүүн, ноолууран бүтээгдэхүүний үйлдвэрлэлийн салбаруудын хүрээнд салбар хэлэлцүүлэг болон ганцаарчилсан B2B уулзалтууд болно.
МҮХАҮТ, Рязань муж хооронд ОХУ-ын худалдаа, эдийн засаг, шинжлэх ухаан, техник, хөрөнгө оруулалтын харилцааг өргөжүүлэх санааг дэмжиж, хоёр улсын бизнес эрхлэгчид, байгууллага, аж ахуйн нэгжүүдийн бизнесийн харилцааг хөгжүүлэх, харилцан ашигтай хамтын ажиллагааг өргөжүүлэх, хөрөнгө оруулалт татах чиглэлээр хамтран ажиллахаар санамж бичиг байгууллаа.
Санамж бичгийг МҮХАҮТ-ын Гүйцэтгэх захирал Ц.Магнайбаатар, ОХУ-ын "Рязань мужийн Худалдаа, Аж Үйлдвэрийн Танхимын Ерөнхийлөгч Людмила Анатольевна нар үзэглэв.
Чуулганы үеэр гурван улсын танхимын дэргэдэх Арбитрын байгууллагууд салбар хэлэлцүүлэг зохион байгуулж, Монголын Олон Улсын Арбитрын дарга С.Энхцэцэг "Монгол Улсад арилжааны маргааныг арбитраар шийдвэрлэх нь" сэдвээр илтгэл тавьж санал солилцов.
Мөн “Шинэ үеийн нөхцөлд Орос, Хятад, Монголын тээврийн логистикийг нэгтгэх үүрэг” хэлэлцүүлэгт МҮХАҮТ-ын Худалдааны бодлогын газрын дарга Д.Адьяасүрэн модератораар оролцлоо.
Чуулганд МҮХАҮТ-ын Гүйцэтгэх захирал Ц.Магнайбаатар, Монголын Олон Улсын Арбитрын дарга С.Энхцэцэг, ХБГ-ын захирал Д.Адьяасүрэн, ҮЯТ-ийн захирал Ч.Баттулга нар болон 20 гаруй аж ахуйн нэгж, бизнес эрхлэгчдийн төлөөлөл оролцож байна.
Форум олон улсын, болон бүс нутгийн засгийн газрын удирдагч нар, бизнес эрхлэгчдийг дэмжигч байгууллага, хөрөнгө оруулагч болон сангууд, төрийн корпорацууд, холдингууд, шинжлэх ухаан, дипломатын газруудын илтгэлээр 07 дугаар сарын 02-04-ний өдрүүдэд ОХУ-ын Эрхүү хотноо үргэлжилнэ.
