ХӨДӨЛМӨР ЭРХЛЭЛТИЙН УЯН ХАТАН ХЭЛБЭРҮҮДИЙН НЭВТРҮҮЛЭХ НЬ СЭДВИЙН ХҮРЭЭНД АЖ АХУЙН НЭГЖ, БАЙГУУЛЛАГУУДАД ЗОРИУЛСАН УУЛЗАЛТ, ХЭЛЭЛЦҮҮЛГИЙГ ЗОХИОН БАЙГУУЛЛАА

Монгол Улсын Засгийн газраас “Халамжаас хөдөлмөрт” бодлогыг хэрэгжүүлж байгаа бөгөөд ажил эрхлэхэд хүндрэлтэй иргэдэд зориулсан хөдөлмөр эрхлэлтийг дэмжих үйлчилгээ, арга хэмжээнүүдийг хэрэгжүүлж байгаа билээ.

Энэ хүрээнд Гэр бүл, хөдөлмөр, нийгмийн хамгааллын яам болон ЖАЙКА олон улсын хамтын ажиллагааны байгууллага хамтран “Монгол Улсын зорилтот бүлгийн иргэдийн хөдөлмөр эрхлэлтийг дэмжих замаар бие даан амьдрахад нь дэмжлэг үзүүлэх тогтолцоог бэхжүүлэх төсөл”-ийг хэрэгжүүлж эхлээд байна.

Уг төслийн хүрээнд хэрэгжүүлж буй “Ажил турших хөтөлбөр”-ийн агуулга, ач холбогдлыг ажил олгогч нарт таниулах, тус хөтөлбөрт оролцох сонирхолтой ажил олгогчдыг нэмэгдүүлж, улмаар цаашдын хамтын ажиллагааны үндэс суурийг тавих зорилгоор Аж ахуйн нэгж, байгууллагуудад зориулсан уулзалт, хэлэлцүүлгийг МҮХАҮТ, МЗБХ, МАОЭНХ, Манлайлагч хүний нөөцийн менежрүүдийн холбоотой хамтран зохион байгууллаа. Уулзалтад нийт 80 орчим аж ахуйн нэгж, байгууллагын удирдлага, хүний нөөцийн мэргэжилтнүүд оролцож, харилцан туршлагаа солилцсон юм.

Ажил эрхлэх хүсэлтэй иргэд олон байгаа ч, богиносгосон цагаар ажиллуулах зэрэг хөдөлмөрийн уян хатан хэлбэр санал болгож буй аж ахуйн нэгж, байгууллага цөөн, тухайн иргэд ажилдаа ирж очиход хүндрэлтэй зэрэг бэрхшээлүүд нийтлэг тулгарч байна.

Энэхүү уулзалтад “Ажил турших хөтөлбөр”-ийн тухай, Япон улсын бүтэн бус цагийн хөдөлмөр эрхлэлт, цагийн ажлын тогтолцоо ба уян хатан хөдөлмөр эрхлэлтийн хэлбэрүүд зарим аж ажуйн нэгж, байгууллагын хэрэгжүүлж буй бодит жишээ бүхий мэдээллийг төслийн Ахлах зөвлөх Чиба Хисао (Ph.D) танилцуулсан бол Блюфин групп, Скай хайпермаркет (emart), Дижитал концепт ХХК (GS25), SAMUSHIL хөдөлмөр зуучлалын фирмийн төлөөллүүд нийт 8 илтгэл мэдээллийг танилцуулсан. Мөн “Хөдөлмөр эрхлэлтийн уян хатан хэлбэрийг нэвтрүүлэх нь” сэдвийн хүрээнд хэлэлцүүлэг өрнүүлж, аж ахуйн нэгж байгууллагууд ололт, амжилт, хүндрэл, бэрхшээлээ нээлттэй ярилцлаа.

Цаашид төслийн хүрээнд хамтран ажиллах хүсэлтэй аж ахуйн нэгж, байгууллагууд jica.ils.m@gmail.com цахим хаягаар хандах боломжтой.