МОНГОЛ СИНГАПУРЫН ХООРОНДЫН БИЗНЕСИЙН ХАРИЛЦАА, ХОЛБОО, ХАМТЫН АЖИЛЛАГАА УУЛЗАЛТ АРГА ХЭМЖЭЭ БОЛЖ БАЙНА
Тус уулзалтыг нээж МҮХАҮТ-ын Гүйцэтгэх захирал Б.Саруул: 
Сингапур бол ухаалаг хөгжил, тогтвортой байдал, санхүүгийн инновац, технологийн салбарт тэргүүлэгч орон юм. Мөн Сингапур–Монголын хооронд дипломат харилцаа тогтоосны 55 жилийн ой тохиож буй энэ цаг үед болж байгаа 2 талын бизнес уулзалтад хүрэлцэн ирсэн та бүхнийг худалдаа, хөрөнгө оруулалтаас гадна урт хугацааны харилцааг бий болгох, бизнесийн сүлжээг бэхжүүлэх, инновацыг дэмжих үнэ цэнийг бий болгох, найдвартай түншлэлийн үндэс суурийг тавина гэдэгт итгэлтэй байна гээд бизнес форумын үйл ажиллагаанд амжилт хүслээ.
Сингапураас Худалдаа логистик, программ хангамж, англи хэлний сургалт, Химийн болон бордооны үйлдвэрийн зураг төсөл, инженерчлэл, процессын хөгжүүлэлтийн чиглэлээр үйл ажиллагаа явуулдаг 8 компанийн 20 орчим бизнес эрхлэгч, Монголын талаас тус чиглэлийн 10 гаруй бизнес эрхлэгчид оролцон хамтын ажиллагааны талаар ярилцаж байна.
Монгол, Сингапурын бизнес хоорондын уулзалтыг МҮХАҮТ, ЭСЯ Сингапурын Бизнесийн Холбоо, Энтерпрайс Сингапур төрийн агентлагтай хамтран зохион байгуулж байгаа бөгөөд цаашид хамтран ажиллах яриа хэлэлцээр хийх, бизнес эрхлэгчдийн В2В уулзалтаар үргэлжиллээ.
Мөн арга хэмжээний үеэр "Монголд орж ирж буй гадаадын аж ахуйн нэгжүүдэд тулгарч буй бэрхшээл, боломжууд сэдвээр МҮХАҮТ-ын Эдийн засгийн судалгааны хүрээлэнгийн захирал О.Түмэн-Амар илтгэл тавилаа.
2024 онд Сингапураас 10.4 сая ам.долларын бараа бүтээгдэхүүн экспортолж, 45.0 сая ам.долларын импорт хийсэн нь Монгол Улсын нийт бараа эргэлтийн 0.2 хувь эзэлж байна.
Одоогийн байдлаар Монгол-Сингапур нь уул уурхай, боловсрол, үйлчилгээний салбар, хүний нөөцийг хөгжүүлэх, төрийн албан хаагчдыг мэргэшүүлж, чадавхийг бэхжүүлэхэд хамтран ажиллаж байна. Монгол Улсад Сингапурын хөрөнгө оруулалттай 30 орчим компани байгаагийн ихэнх нь худалдаа, нийтийн хоолны салбарт, мөн геологи, уул уурхайн эрэл хайгуул, олборлолт, банк, санхүүгийн салбарт харьяалагдаж байна.
