МОНГОЛ УЛС, ТУРКМЕНИСТАН УЛС ХООРОНДЫН ХУДАЛДАА, ЭДИЙН ЗАСГИЙН ХАМТЫН АЖИЛЛАГАА ТОДОРХОЙ ТҮВШИНД ӨРГӨЖИХ ЭХЛЭЛ ТАВИГДАЖ БАЙНА
Монгол Улсад болж буй хоёр дахь удаагийн бизнес форум нь хоёр орны бизнес эрхлэгчдийн хамтын ажиллагааг өргөжүүлж, хөрөнгө оруулалт, худалдааг нэмэх, шинэ санаачилгыг хэрэгжүүлэхэд чухал ач холбогдолтой юм. Туркменистан Улсын Ашхабад хотноо өнгөрсөн онд болсон бизнес форумын үеэр хоёр улсын бизнес эрхлэгчид хөдөө аж ахуй, тээвэр ложистик, эрчим хүч, боловсруулах үйлдвэрлэл зэрэг салбарын хамтын ажиллагааны талаар хэлэлцэн, туршлага солилцсон бол энэ удаагийн уулзалтаар хөдөө аж ахуйн салбарын хамтын ажиллагааг онцолж байна. Ингэхдээ ноос, ноолуур, арьс ширийг хэрхэн үнэд хүргэх вэ гэдэгт хоёр орны бизнес эрхлэгчид туршлага солилцож буй юм.
Форумыг нээж Монгол Улсын Их Хурлын гишүүн, Шадар сайд Т.Доржханд, Туркменистан Улсын Шадар сайд, Туркменистаны Аж үйлдвэрчний болон бизнес эрхлэгчдийн холбооны захирлын зөвлөлийн дарга Нокергулы Атагулыев нар үг хэллээ. 2024 хоёр улсын Засгийн газар, салбарын яамд хооронд Тээвэр, ложистик, Хөдөө аж ахуй, мал аж ахуйн, Соёл, аялал жуулчлалын салбаруудад гол гэрээ хэлэлцээр, санамж бичгүүдийг амжилттай байгуулсан нь хоёр орны найрсаг харилцаа, хамтьн ажиллагааны суурийг улам бататгалаа гэдгийг сайдууд хэлж байлаа.
Мөн нээлтэд МҮХАҮТ-ын Ерөнхийлөгч бөгөөд Удирдах зөвлөлийн дарга Л.Төр-Од оролцон, Ашхабад хотноо 2024 оны 10 дугаар сард болсон Монгол-Туркменистаны бизнес форумын үеэр хоёр улсын бизнес эрхлэгчид хөдөө аж ахуй, тээвэр логистик, эрчим хүч, боловсруулах үйлдвэрлэл зэрэг салбарын хамтын ажиллагааны талаар хэлэлцэн, туршлага солилцсон нь өнөөгийн энэхүү уулзалтын үнэт суурь болсныг дурдаад, хоёр улсын худалдаа, эдийн засгийн харилцаа одоогоор төдийлөн өндөр түвшинд хүрээгүй байгаа ч, сүүлийн жилүүдэд аажмаар өргөжин тэлж шинэ салбарууд руу хамтран ажиллах сонирхол нэмэгдэж байгааг онцлон тэмдэглэлээ.
Туркменистан Улс нь байгалийн хий, эрчим хүч, хөнгөн үйлдвэрлэл, хөдөө аж ахуй, барилгын материалын экспортын чиглэлээр бүс нутагтаа төдийгүй олон улсад тэргүүлэх байр суурь эзэлж буй, эдийн засгийн өндөр өсөлттэй улс юм. Монгол Улсын хувьд стратегийн байршил, байгалийн баялаг, нээлттэй зах зээл, тогтвортой бодлогоороо хөрөнгө оруулалт, хамтын ажиллагааны бодит боломжууд дээр хамтран ажиллах боломжтой.
Манай улс 163 улстай худалдаа хийж, гадаад худалдааны нийт эргэлт 27.4 тэрбум ам.долларт хүрсэн нь өмнөх оноос 12 хувиар өссөн, эдийн засгийн идэвхжил нэмэгдэж байгааг илтгэсэн чухал үзүүлэлт байв. Үүний дотор экспорт 15.8 тэрбум, импорт 11.6 тэрбум ам.долларт хүрч, тэнцвэртэй, тогтвортой өсөлт ажиглагдсан юм.
