ТУРКМЕН ХИВСНИЙ ҮЗЭСГЭЛЭН ХУДАЛДАА БОЛЛОО
Туркмен хивс нь олон зууны түүхтэй, маш нарийн ажиллагаа шаарддаг уламжлалт гар урлалын бүтээл бөгөөд Туркмен ард түмний оюун ухаан, тэсвэр тэвчээр, гоо зүйн мэдрэмжийг илэрхийлдэг.
Туркменистан Улсын музейн ажилтан Гожмурат Чарыев, “Хивс болон гар урлалын бүтээгдэхүүний энэхүү үзэсгэлэнг Монгол, Туркменистан Улсын харилцааг улам бэхжүүлэхэд зориулж гаргасан. Манай хоёр орон соёл урлагийн салбарт төдийгүй бүх салбарт харилцаагаа өргөжүүлэхийг зорьж буй. Үзэсгэлэн худалдаанд XVII зууны Туркменистан Улсын музейн хувцас, гоёл чимэглэлээс гадна гар урлалаараа дэлхийд алдартай Туркмен хивсээрээ оролцож байна” гэв.
Хивс нэхэх үйл явц нь малын ноос эсвэл торгоны утсыг гар аргаар будах, хатаах, хээ угалзын дагуу зангилаа зангидаж нэхэх зэрэг олон үе шаттай.
Туркмен хивсний урлагийг олон нийтэд таниулах зорилготой энэ удаагийн үзэсгэлэнд Туркменистан Улсын 5 үйлдвэрийн төрөл бүрийн хэмжээтэй торгон 20, хонины ноосон 15 гаруй гар хийцийн хивс тавигдсан байна.
Үзэсгэлэнгийн хүрээнд хивснээс гадна Туркменийн уламжлалт үндэсний хувцас, гар урласан гоёл чимэглэлүүд ч дэлгэгдэх ба эдгээр нь угсаатны соёл, гоёлын хэв маяг, гар урлалын уран нарийн чадварыг мөн адил танилцуулж байна.
Энэхүү үзэсгэлэн нь Монгол-Туркменистаны соёлын харилцааг гүнзгийрүүлж, гар урлалын үнэ цэнийг олон нийтэд ойлгуулах, харилцан суралцах, соёлын солилцоог дэмжих чухал ач холбогдолтой юм.
Нэг хивсийг бүтээхэд хэдэн сараас бүтэн жил хүртэл хугацаа шаардагддаг. Нэхэгч бүсгүйчүүд хивс бүрийн хээ угалзыг өөрсдийн овог, гэр бүл, нутгийн онцлогт тохируулан гаргаж, утга бэлгэдэл, түүх соёлыг нь шингээхээс гадна нэхэхдээ босоо эсвэл хэвтээ нэхмэл машин ашиглах ба бүх үйл явц гар аргаар, өндөр нямбай хийцтэйгээр явагддаг ажээ.
Мөн тус үзэсгэлэн худалдаанд Монголын талаас Эрдэнэт хивс, Улаанбаатар хивс, Цэн трэвэл зэрэг аж ахуйн нэгжүүд арьс шир, хивс, ноос, ноолууран бүтээгдэхүүнээрээ оролцож байна. Эрдэнэт хивс ХХК, Улаанбаатар хивс ХК нь ОХУ, Япон, Казахстан, БНХАУ руу хивс хивсэн бүтээгдэхүүнээ тогтмол экспортолдог юм.
