Төрийн зарим чиг үүргийг Мэргэжлийн Холбоодоор гүйцэтгүүлэх талаар зөвлөлдөх уулзалт зохион байгууллаа
МҮХАҮТ нь 2025-2027 онд хувийн хэвшлийн нийтлэг эрх ашгийг хамгаалах, эдийн засаг дахь оролцоог нэмэгдүүлэх, бизнес эрхлэх хууль эрх зүйн орчныг сайжруулах, төр хувийн хэвшлийн үр дүнтэй түншлэлийг хөгжүүлэх зорилтуудыг дэвшүүлсэн.
Энэ ажлын хүрээнд Монгол Улсын Засгийн газрын Хэрэг эрхлэх газрын даргын тушаалаар Төрийн зарим чиг үүргийг хувийн хэвшил, мэргэжлийн холбоодоор гүйцэтгүүлэх асуудлыг судалж, санал боловсруулах чиг үүрэг бүхий дэд ажлын хэсгийг МҮХАҮТ-ын Гүйцэтгэх захирал Б.Саруул ахлан ажиллаж байна.
Ажлын хэсгээс өнөөдөр бизнесийн салбарын 20 гаруй мэргэжлийн холбоодыг хүлээн авч уулзан, Төрийн зарим чиг үүргийг мэргэжлийн холбоодоор гүйцэтгүүлэх талаар тулгамдаж байгаа асуудал, санал, шийдлийг хэлэлцэн санал солилцлоо. Төрийн зарим чиг үүргийг хувийн хэвшил, мэргэжлийн холбоодоор гүйцэтгүүлснээр яам, агентлагийн эрх мэдлийн төвлөрлийг сааруулах, хүнд суртлыг бууруулах, бизнес, хөрөнгө оруулалтын таатай орчныг бүрдүүлэх чухал ач холбогдолтой аж.
