“Их Хүрээ 2019” худалдаа үйлдвэрлэл эрхлэгчдийн үндэсний чуулган болж байна
Монгол Улсад худалдааны салбар үүсч хөгжсөний 98 жилийн ойн хүрээнд худалдаа эрхлэгчдийн “Их Хүрээ-2019” үндэсний чуулган Төрийн ордонд эхэллээ. Чуулганд төрийн болон ТББ олон улсын байгууллага, худалдаа, үйлдвэрлэл эрхлэгч, нийлүүлэгчдийн төлөөлөл болох 800 гаруй хүн оролцож байна.
Үндэсний чуулганыг нээж Монгол Улсын Ерөнхий сайд У.Хүрэлсүх үг хэлэв. Тэрбээр хууль ёсоор үйл ажиллагаа явуулж, татвараа төлөн, ажлын байр бий болгож, баялаг бүтээж байгаа худалдаа, үйлчилгээ, бизнес эрхлэгчдийг Засгийн газар ямагт дэмжинэ гэдгийг хэлэв. Бизнес эрхлэхэд тулгарч байгаа хүндрэл бэрхшээл, төрийн байгууллага, албан тушаалтантай холбоотой хүнд суртал, дарамт шахалт, авлига, хээл хахуулийг ил тод, нээлттэй ярьж, хэлж, мэдэгдэж байхыг мөн хүсэв. Худалдаа, үйлчилгээ эрхлэгчид ч хэрэглэгчийн эрх ашгийг дээдлэх, иргэдийн эрүүл мэнд, байгаль, хүрээлэн буй орчинд эрсдэл учруулахаас зайлсхийх ёстойг тэмдэглэлээ.
Худалдааны байгууллагууд болон бизнес эрхлэгчдийг төлөөлөн МҮХАҮТ-ын Ерөнхийлөгч О.Амартүвшин хэлэхдээ "Монгол Улсад худалдаа түүний дотор экспортын салбарыг хариуцсан төрийн институци, бодлого хууль эрх зүйн зохицуулалт болон нэгдсэн маркетинг байдаггүй. Мөн бид дижитал технологийг бизнесийн бүхий л салбарт зөв ашиглаж сурах хэрэгтэй байна. Энэ нь жижиг дунд бизнес эрхлэгчдэд олон улсын худалдаанд оролцож ашиг хүртэх боломжийг өргөжүүлнэ" хэмээн онцоллоо.
Мөн МҮХАҮТ-ын хувьд гишүүнчлэлээ өргөжүүлэх замаар бизнес эрхлэгчдийн дуу хоолойг хүчтэй болгох, шийдвэр гаргах түвшинд нөлөөллийг нэмэгдүүлэхийн төлөө ажиллаж байгаа бөгөөд ингэснээр бодлогын өмгөөллийн үр нөлөө илүү сайжран худалдаа, бизнес эрхлэх орчноо бид сайжруулан хамтдаа шинэчлэлийг хийж, хамтдаа манлайлна гэлээ.
“ИХ ХҮРЭЭ- 2019” Монголын Худалдаа Эрхлэгчдийн Үндэсний V Чуулган нь Хамтын шинэчлэл, хамтын манлайлал уриан дор бизнесийн орчин, хөрөнгө оруулалт болон технологи инноваци сэдвийн хүрээнд нээлттэй хэлэлцүүлгээр үргэлжилж байна.