“Хамтдаа асуудлаа шийдэцгээе” төр, хувийн хэвшлийн зөвлөлдөх уулзалт Дархан-Уул аймагт болж байна
“Хамтдаа асуудлаа шийдэцгээе”төр хувийн хэвшлийн зөвлөлдөх уулзалтыг нээж Дархан-Уул аймгийн засаг дарга С.Насанбат, МҮХАҮТ-ын Ерөнхийлөгч О.Амартүвшин нар үг хэлсэн бөгөөд аймгийн ЗДТГ-аас “Аймгийн хөгжлийн бодлого, төлөвлөлт, түүнд хувийн хэвшлийн оролцоо”, МҮХАҮТ-аас “Бизнесийн орчны өнөөгийн байдал, Танхимаас орон нутагт хэрэгжүүлж буй төсөл хөтөлбөрүүд” сэдвээр танилцуулга хийв.
Мөн Танхимаас явуулсан “Дархан-Уул аймгийн бизнесийн орчны үнэлгээ” судалгааны үр дүнг танилцуулав. Дархан-Уул аймагт хийсэн бизнесийн орчны судалгаагаар 10 онооноос харилцаа холбооны салбар 8.1, дэд бүтэц 7.3 оноо авсан бол зах зээлийн багтаамж 5.3, ажиллах хүчний ур чадвар 4.1, ажиллах хүчний хүртээмж 3.9 гэсэн бага оноог авсан бөгөөд аймгийн бизнесийн итгэлийн индекс 0.2 гарсан байна.
Бизнесийн орчинд тулгарч байгаа асуудлаар банкны зээлийн хүү өндөр гэж 77%, ажиллах хүчний хомсдол, ур чадварыг 60%, төрийн бодлогын тогтворгүй байдал гэж 39% нь нэрлэжээ. Бизнесийн орчныг сайжруулахад төр хувийн хэвшлийн хамтын ажиллагаа чухал гэж бизнес эрхлэгчдийн 55 хувь нь хариулсан байна
Хэлэлцүүлгийн хэсэгт махны экспортын асуудал, малын хорио цээрийн бүс тогтоох тухай Засгийн газрын тогтоолын хэрэгжилт, зөгийн аж ахуйн бизнесийг дэмжих боломж, гурилын салбарт тулгамдаж буй асуудлууд, Хятадын зах зээлд бараа бүтээгдэхүүний экспортыг гаргах талаар Баяннуур аймагтай хамтарсан төслийн хүлээгдэж буй үр дүн, ил тод байдал, мэдээллийн хүртээмж, төр хувийн хэвшлийн хамтын ажиллагааг үр дүнтэй болгох, төрийн зарим чиг үүргийг төрийн бус байгууллагад шилжүүлэх болон бизнес эрхлэгчдээс аймгийн удирдлагад өмнө нь тавьсан зарим асуудлын хэрхэн шийдвэрлэж байгаа талаар тойрч ярилцлаа.
Зөвлөлдөх уулзалтаар төр хувийн хэвшлийн оролцогч талууд асуудал, боломж, шийдлээ хамтран тодорхойлох юм.