“АЛТАН БЭРС” ЦОМЫН ТӨЛӨӨХ КОРПОРАЦУУДЫН ШАТРЫН АВАРГА ШАЛГАРУУЛАХ ТЭМЦЭЭНИЙГ АЗИ ТИВД АНХ УДАА ЗОХИОН БАЙГУУЛЖ БАЙНА

2025/03/28 0

МҮХАҮТ-ын 65 жилийн ойн нэрэмжит ТОП-100 ААН-ийн дундах "АЛТАН БЭРС" цомын төлөөх корпорацуудын аварга шалгаруулах шатрын анхдугаар тэмцээн өнөөдөр нээлтээ хийлээ.

Корпорациудын аварга шалгаруулах тэмцээн нь анх 2021 онд цахимаар болж 78 орны 280 гаруй корпорацийн баг тамирчид оролцож байсан бол, цаашид хүрээгээ тэлэн Нью-Йорк Хотын Корпорацийн Шатрын Лиг, Европын Корпорацийн Аварга Шалгаруулах Тэмцээн үндэсний болон тивийн хэмжээнд аварга шалгаруулах тэмцээнүүд явагдсаар ирсэн түүхтэй аж. Мөн ХБНГУ болон Испани улсад зохиогддог “Банк хоорондын” шатрын тэмцээнд Монгол Улсаа төлөөлөн Төрийн банк, Голомт банк, Капитрон банкууд амжилттай оролцож байсан байна.

Энэ удаа “Алтан бэрс” цомын төлөөх корпорацуудын шатрын аварга шалгаруулах тэмцээнийг Азидаа анх удаа зохион байгуулж байгаа ба тус тэмцээний ялагчид, 2025 онд зохион байгуулагдах Корпорацуудын Дэлхийн аварга шалгаруулах тэмцээнд Монгол Улсыг төлөөлөн оролцох багаар тодрох юм.

Тэмцээний нээлтэд МУ-ын Ерөнхийлөгчийн Тамгын Газрын дарга Г.Занданшатар, МҮХАҮТ-ын Ерөнхийлөгч Л.Төр-Од, Гүйцэтгэх захирал А.Амартөгс, Голомт банкны Ерөнхийлөгч Г.Ганболд болон тэмцээнд оролцогч компаниудын төлөөллүүд оролцож тамирчдад баяр хүргэн амжилт хүслээ.

МҮХАҮТ-ын ерөнхийлөгч Л.Төр-Од нээлтийн үгэндээ “Энэхүү тэмцээний жил бүр уламжлал болгон зохион байгуулна. Анхдугаар тэмцээнд 24 топ байгууллага оролцож байгаа ч цаашид жилээс жилд улам өргөжин тэлнэ гэдэгт итгэлтэй байна. Уг тэмцээн МҮХАҮТ-ын 65 жилийн ойн хүрээнд болж буйгаараа онцлогтой. Манай танхим Монголын шатрын холбооны түнш байж олон сонирхолтой тэмцээнийг хамтран зохион байгуулна” гэлээ.

“Алтан бэрс” анхдугаар тэмцээний цомыг Монгол Улсын 20 дахь аварга С.Мөнхбат санаачлан хийлгэсэн бөгөөд алтаар бүрж, төгс гэгээрлийн мэлмий, Монголын соёлын олон өнцгийг шингээжээ.

Тэмцээнийг Олон Улсын Шатрын Холбоо (ФИДЕ) болон Монголын Шатрын Холбоо (МоШХ)-ны дүрмийн дагуу зохион байгуулан, Ерөнхий шүүгчээр Олон улсын шүүгч Б.Нямдаваа ажиллах юм.

Тэмцээний 1-р ширээний 1-р өргийг Цагаан талаас ЦДҮС ТӨХК баг, хар талаас ХХБ багийн тоглолтуудаар эхлүүллээ.

Энэхүү тэмцээнийг Монголын Үндэсний Худалдаа Аж Үйлдвэрийн Танхим санаачлан Монголын Шатрын Холбоотой хамтран зохион байгуулж, хэвлэл мэдээллийн дэмжигч байгууллагаар Монголын Үндэсний Олон Нийтийн Радио Телевиз, 25 дугаар суваг телевиз тус тус ажиллав.

Монгол Улсын ТОП-100 ААН-ийн дундах “Алтан бэрс” цомын төлөөх корпорацуудын аварга шалгаруулах шатрын анхдугаар тэмцээнд дараах ААН байгууллагуудын тамирчид оролцож оюун ухаан, авхаалж самбаагаа сорино.