МОНГОЛ УЛСЫН ХӨГЖЛИЙН БАНКТАЙ МҮХАҮТ ХАМТРАН АЖИЛЛАНА

2025/03/27 0

Монгол Улсын засгийн газраас хэрэгжүүлэх “Шинэ сэргэлтийн бодлого”-ын хүрээнд Уул уурхайн бус экспортыг дэмжих санхүүжилтийн тогтолцоог хөгжүүлэх чиглэлээр хамтран ажиллах, төр, хувийн хэвшил, хөрөнгө оруулагчдын идэвхтэй хамтын ажиллагааг хөгжүүлэхэд Хөгжлийн банк, МҮХАҮТ хамтран ажиллахаар санамж бичиг үзэглэв.

Санамж бичигт Монгол Улсын Хөгжлийн банкны Гүйцэтгэх захирал З.Нарантуяа, МҮХАҮТ-ын Ерөнхийлөгч Л.Төр-Од нар гарын үсэг зурлаа.

Талууд:

Танхимын гишүүн байгууллагуудын хэрэгжүүлэх боломжит экспортыг дэмжих, импортыг орлуулах үйлдвэрлийг дэмжих, тогтвортой ногоон ба дижитал төсөл, хөтөлбөрийг тодорхойлох, санхүүжилтийн хэрэгцээ шаардлагыг тодорхойлох;
Зорилтот төсөл, хөтөлбөр хэрэгжүүлэх үйл ажиллагаа, арга хэмжээний талаарх мэдээллийг Талууд өөрийн хэвлэл мэдээлэл, олон нийттэй харилцах сувгийг ашиглан түгээх;
Танхимаас явуулж буй эдийн засаг, бизнесийн хууль эрхзүй ба бодлогын өмгөөлөлтэй холбоотой судалгаанд идэвхтэй оролцох;
Танхимын гишүүн компаниуд, хувиараа бизнес эрхлэгчдэд санхүүгийн боловсролыг дээшлүүлэх сургалт зохион байгуулах чиглэлээр хамтран ажиллах;
Танхимын дэргэдэх Монголын Олон Улсын Арбитр нь Монгол банкны салбарын санхүүгийн байгууллагууд, бизнес эрхлэгчид, санхүүгийн бус бизнес, мэргэжлийн оролцогчдод гэрээний эрх зүй, хууль, эрх зүйн зөвлөгөө, туслалцаа үзүүлэх, худалдааны арбитрын үйл ажиллагааг таниулах мэдлэг олгох, мэдээлэл түгээх сургалтыг зохион байгуулахад арбитрчдын оролцоог хангах, хамтран зохион байгуулах;
Эдийн засаг, худалдаа, хөрөнгө оруулалт, салбаруудын мэдээ мэдээлэл, судалгаа, тоо баримтыг харилцан солилцох;
Талууд санамж бичгийн хэрэгжилтийг өөрсдийн гадаад болон дотоодын орон нутаг дахь салбар, төлөөлөгчийн газар, ажилтнаар дамжуулан бүх шатанд хангаж ажиллах;
Уул уурхайн бус экспортыг дэмжих чиглэлээр төрөл бүрийн арга хэмжээнүүдийг зохион байгуулах;
Эдийн засаг, худалдаа, хөрөнгө оруулалт, салбаруудын мэдээ мэдээлэл, судалгаа, тоо баримтыг харилцан солилцох зэргээр хамтран ажиллана.