ДЭЛХИЙН БИЗНЕС ЭРХЛЭГЧ ЭМЭГТЭЙЧҮҮДИЙН ЧУУЛГА УУЛЗАЛТ МОНГОЛ УЛСАД БОЛНО
Гадаад харилцааны сайд Б.Батцэцэг бизнесийн салбарт манлайлагч, баялаг бүтээгч, хөрөнгө оруулагч бизнес эрхлэгч эмэгтэйчүүдийн төлөөлөлтэй уулзаж, 8 дугаар сарын 25-26-ны өдрүүдэд Монгол Улсын Ерөнхийлөгч Ухнаагийн Хүрэлсүхийн ивээл дор зохион байгуулах Дэлхийн бизнес эрхлэгч эмэгтэйчүүдийн чуулга уулзалтын талаар танилцуулж, санал солилцов.
Дэлхийн бизнес эрхлэгчдийн чуулга уулзалтыг "Inspire, Impact, Invest" уриатайгаар зохион байгуулах бөгөөд Бизнес эрхлэгч эмэгтэйчүүдийг дэмжих, чадавхжуулах, бие биеэсээ урам зориг авах, сайн туршлагаас судлах, хөрөнгө оруулалт татах зорилготой юм. '
МҮХАҮТ-ын Ерөнхий нарийн бичгийн дарга Б.Саруул “2024 онд “Дэлхийн эмэгтэйчүүдийн чуулга уулзалт”-ыг МҮХАҮТ нь ОУХТ-н SheTrades Hub, Танхимын дэргэдэх бизнес эрхлэгч эмэгтэйчүүдийн зөвлөл болон гишүүн байгууллагуудын дэмжлэгтэйгээр амжилттай зохион байгуулсан.
Дэлхийн Худалдааны Байгууллага, Олон Улсын Худалдааны төвийн хамтын санаачилгын “Цахим Эдийн Засаг дахь эмэгтэй экспортлогчдыг дэмжих сан”-гаас зарласан төсөлд дэлхийн 600 гаруй байгууллагууд өрсөлдөж МҮХАҮТ төсөл хэрэгжүүлэх 4 байгууллагын нэгээр шалгарсан.
МҮХАҮТ-ын түүхэн 65 жилийн ойн босгон дээр бид анх удаа Дэлхийн Худалдааны байгууллагатай хамтарсан төсөл хэрэгжүүлэх болсон түүхэн үйл явдал тохиож байна. Иймээс энэ жилийн Дэлхийн Бизнес Эрхлэгч Эмэгтэйчүүдийн чуулга уулзалтад МҮХАҮТ-ын зүгээс өндөр ач холбогдол өгч Дэлхийн Худалдааны байгууллага, Олон улсын худалдааны төвийн удирдлагууд, 21 улсын SheTrades Hub-уудын төлөөллүүд болон олон улсын топ бизнес эрхлэгч эмэгтэйчүүдийг оролцуулж түншлэлийн харилцааг нэмэгдүүлэх, зах зээл, санхүүгийн хүртээмжийг сайжруулах боломжуудыг бий болгохоор бэлтгэл ажлаа эхлүүлж байна” гэв.
