МҮХАҮТ-ЫН ГҮЙЦЭТГЭХ ЗАХИРАЛ А.АМАРТӨГС, ШИНЖЛЭХ УХААНЫ ПАРКИЙН ЗАХИРГААНЫ УДИРДЛАГУУДТАЙ УУЛЗАЛТ ХИЙВ
Уулзалтаар Гүйцэтгэх захирал А.Амартөгс, МҮХАҮТ дээр ЕХ-ны Худалдааг дэмжих төслийн санхүүжилттэйгээр арьс шир, ноос ноолуур, мах, гоо сайхан, чацарганы кластер, мөн эдгээрийг нэгтгэсэн экспортыг дэмжих кластерийг хөгжүүлж байгаа бөгөөд хөдөө аж ахуй, мах махан бүтээгдэхүүн үйлдвэрлэлийн хог хаягдал дээр шинжлэх ухаан суурьтай хөгжүүлэлт хийх хэрэгцээ бий. Бид хамтын асуудалд суурилсан платформ (problem solving platform) бий болгох, мөн e-business-ийг шилжүүлэн авахаар төлөвлөж байгаа. Бизнес эрхлэгчдийг шинжлэх ухааны талаас мэдээлэлжүүлэх, эрдэмтдийн судалгаа, хөгжүүлэлтийн PR-ийг МҮХАҮТ зохион байгуулж, ШУПЗ мэдээллээр хангах, холбох ажлуудыг хийх боломжтой гэдгийг хэллээ.
МУ-ын Шинжлэх ухааны паркийн захиргааны гүйцэтгэх захирал Б.Амарсанаа, Эдийн засаг хөгжлийн яамны харьяа Шинжлэх ухааны паркийн захиргаа нь Монгол улсын их дээд сургуулиуд, эрдэм шинжилгээний байгууллагууд, төр, хувийн хэвшлүүдийн хоорондын хамтын ажиллагааг эрчимжүүлэх, эрдэм шинжилгээ, судалгааны үр дүнг үйлдвэрлэл, зах зээлд нэвтрүүлэх, өрсөлдөхүйц технологи суурьтай гарааны компаниудыг бойжуулах, дэвшилтэт технологи дамжуулалтыг дэмжих, өндөр технологийн үйлдвэрлэлийг хөгжүүлэх инновацын дэд бүтцүүдийг байгуулах, тэдгээрийн хууль эрх зүйн орчныг боловсронгуй болгох чиглэлээр үйл ажиллагаа явуулж байна. Технологи дамжуулах болон инкубатор төвүүдийн хөгжлийн шатан дах хүндрэлтэй цаг үеийг даван туулахад нь бид МҮХАҮТ-тай хамтран ажиллах зайлшгүй шаардлагатай байна гэв.
Талууд цаашид ажлын хэсэг байгуулан хамтын ажиллагааны гэрээ, нарийвчилсан төлөвлөгөө гарган шинжлэх ухааны хүрээлэнгүүдийн үйл ажиллагаатай танилцах, шинжлэх ухааны байгууллагуудаас судалгаа, тоон мэдээллийг тогтмол авч контент хэлбэрээр бизнес эрхлэгчдэд хүргэх зэргээр хамтран ажиллахаар боллоо.
Уулзалтад МҮХАҮТ-ын Дэд захирал Г.Мягмаржав, Оюуны өмчийн төвийн ахлах менежер С.Дүүрэнжаргал, Инкубатор төвийн менежер Доржсүрэн, МУ-ын Шинжлэх ухааны паркийн захиргааны технологи дамжуулах албаны дарга С.Гэрэлт-Ирээдүй нар оролцож санал солилцлоо.
