FOODEX JAPAN 2025 ҮЗЭСГЭЛЭНД МОНГОЛЫН БАРАА БҮТЭЭГДЭХҮҮНИЙГ ИХЭЭР СОНИРХОЖ БАЙНА
FOODEX JAPAN 2025 ҮЗЭСГЭЛЭНД МОНГОЛЫН БАРАА БҮТЭЭГДЭХҮҮНИЙГ ИХЭЭР СОНИРХОЖ БАЙНА
Азидаа хамгийн том хүнсний үзэсгэлэн болох FOODEX Japan 2025 Япон улсын Токио хотноо “Big Sight” үзэсгэлэнгийн төвд /2025.03.11/ нээлтээ хийлээ.
Тус үзэсгэлэн нь 50 дахь удаагаа зохион байгуулагдаж байгаа ба МҮХАҮТ-аас бизнес аяллын групп зохион байгуулан, Япон улсын ижил төстэй аж ахуйн нэгжийн бараа бүтээгдэхүүнийг үзэж сонирхон хамтын ажиллагаагаа өргөжүүлэх, туршлага судлав. Тус экспогийн нээлтийн арга хэмжээнд Монгол Улсаас Япон Улсад суух элчин сайд Б.Баярсайхан оролцож, Хаан жимс ХХК нь Хуба хаяа брэнд, Норд Роуд ХХК Хушхан брэнд, Булган мах маркет ХХК Адууны махан бүтээгдэхүүн, Цагаан асгат ХХК Шимийн охь брэнд, Такаражима Жапан компани Чацарганын бүтээгдэхүүн, Витафит инвест ХХК Луувангийн жүүс, нухаш бүтээгдэхүүн, MACU компани бяслаг зэрэг бүтээгдэхүүнээ дэлгэн оролцож байна.
Энэ удаагийн үзэсгэлэнд Монголын хүнсний бүтээгдэхүүн үйлдвэрлэгчдийг Японы зах зээлд гаргах, бүтээгдэхүүнийг хэрэглэгчдэд танилцуулах, экспортын боломжийг эрэлхийлэх зорилгоор Жайка ОУБ, Засгийн газрын хэрэгжүүлэгч агентлаг ЖДҮГ, Монгол-Япон хүний нөөцийн хөгжлийн төв, МҮХАҮТ, Жугамо-Японд сургуульд төгсөгчдийн холбоо нар хамтран ажилласан.
Үзэсгэлэн энэ сарын 14-нийг дуустал үргэлжлэх ба Монгол улсын павильонд олон хүн айлчлан, бараа бүтээгдэхүүний дээжийг сонирхсоор байна.
FOODEX JAPAN үзэсгэлэн нь өнгөрсөн 50 жилд нийт 80 мянга гаруй оролцогч, 4,0 сая гаруй худалдан авагчдад хүрч үйлчлэн, тэдний бизнесийн үйл ажиллагаагаа өргөжүүлэхэд нь түлхэц үзүүлсэн байна.
