ОХУ-д ноолуурын эрэлт бий болгож, жигнэсэн махыг нэгдсэн бодлогоор экспорлоход хамтарч ажиллана
Монгол Улсын Ерөнхий сайд У.Хүрэлсүхийн ОХУ-д хийсэн албан ёсны айлчлалын хүрээнд 12 дугаар сарын 4-ний өдөр ”Монгол-Орос Евразийн эдийн засгийн холбооны нэгдсэн зах зээлд бизнес эрхлэх нь” сэдэвт бизнес форумыг МҮХАҮТ болон Оросын Холбооны худалдаа аж үйлдвэрийн танхим хамтран зохион байгууллаа. Форумд Монголын талаас 30 компанийн 50 төлөөлөгч, Оросын талаас 80 компанийн 120 бизнес эрхлэгч оролцож, бизнесийн төслүүдээ харилцан танилцууллаа.
Энэ үеэр МҮХАҮТ-аас ОХУ-ын ХАҮТ-тай “Хамтран ажиллах хэлэлцээр”, МҮХАҮТ, ОХУ-ын Москвагийн ХАҮТанхим хоорондын хамтын ажиллагааны санамж бичиг, Евразийн эдийн засгийн холбооны Ажил хэргийн зөвлөлтэй хамтран ажиллах санамж бичиг зэргийг байгууллаа. Хамтын ажиллагааны санамж бичгийг анх 1993 онд байгуулж байсан бөгөөд нэмэлт агуулгаар баяжуулан шинэчлэн зурснаар мэдээлэл солилцох, харилцан бизнес аялал зохион байгуулах, цахим хамтын ажиллагааг хангах зэргээр өргөжиж байна.
Түүнчлэн Москвагийн ХАҮТ-ын бизнесийн нэгдсэн сайтаар дамжуулж бизнесийн санал солилцох, ОХУ-ын зах зээлд бизнес эрхлэх боломжууд нээх “БИЗНЕС-МАРКЕТ хамтын ажиллагааны платформ ашиглах хэлэлцээр”-т гарын үсэг зурлаа. Хэлэлцээрийн дагуу цаашид ОХУ руу жигнэсэн махыг нэгдсэн бодлогоор гаргах, ОХУ-д ноолуурын эрэлтийг бий болгоход ОХУ-ын танхимтай хамтран ажиллахаар болов. Мөн
шатахууны дутуу ачилтыг импортлогч нөхөн олгодог болох зохицуулалтын талаар талууд ярилцсан бөгөөд хоёр улсын компаниудын мэдээллийг орчуулж хуваалцдаг цахим талбар нээхээр болов.
Мөн хоёр орны бизнес эрхлэгчид хамтын ажиллагааны гэрээ хэлцлүүдийг хийсэн бөгөөд тухайлбал Монгол Эм Импэкс Концерн ОХУ-ын ЛАЗА Лабораторис компанитай нийт 500,000 еврогийн хамтран ажиллах гэрээнд гарын үсэг зурсан байна.
Тус айлчлалыг тохиолдуулан Монгол Улсын ГХЯ, МҮХАҮТ, Евразийн эдийн засгийн холбоо болон Оросын ХАҮТ хамтран “Монголд үйлдвэрлэв” бараа бүтээгдэхүүний үзэсгэлэнг зохиосон бөгөөд Монголын 50 гаруй бизнес эрхлэгчид, томоохон компаниуд оролцож, экспортод гарч үндэсний бараа бүтээгдэхүүнээ сурталчиллаа.
