Л.ТӨР-ОД: ЭРДЭНЭТ БОЛ МҮХАҮТ-ЫН УУГАН ГИШҮҮН, ЭДИЙН ЗАСГИЙН ТҮҮЧЭЭЛЭГЧ, МАНЛАЙЛАГЧ ҮЙЛДВЭР ЮМ
Эрдэнэт машин цогцолбор үйлдвэр форум -2025 арга хэмжээ өнгөрсөн долоо хоногт Орхон аймагт болж өнгөрлөө. Монгол Улсын машин механизмын салбарын хөгжлийг ярилцаж үндэс суурийг тавьсан уг форумыг Зам тээврийн хөгжлийн яам санаачлан Эрдэнэт үйлдвэр, МҮХАҮТ хамтран зохион байгуулсан юм.
Энэ үеэр МҮХАҮТ-ын Ерөнхийлөгч Л.Төр-Од Эрдэнэт үйлдвэр ТӨҮГ-ын ерөнхий захиралтай уулзаж, хамтын ажиллагааны талаар ярилцсан юм. Үндэсний Танхимын зүгээс Эрдэнэт машин үйлдвэр цогцолбор төслийг хэрэгжүүлэхэд гадаад, дотоодын хөрөнгө оруулалт татах, энэхүү том төслийг дагасан жижиг, дунд үйлдвэрлэлийг хөгжүүлж өргөжүүлэхэд бизнес эрхлэгч, компаниудаа манлайлан ажиллана. Мөн Эрдэнэт үйлдвэр МҮХАҮТ-тай эдийн засгийн судалгаа, сургалтын чиглэлд хамтран ажиллахаар боллоо.
Ерөнхийлөгч Л.Төр-Од “Эрдэнэт үйлдвэр нь Үндэсний танхимын ууган гишүүн, ТОП-100, Entrepreneur арга хэмжээг жил бүр түүчээлэн ирсэн, Монгол Улсын эдийн засагт тодорхой үүрэг гүйцэтгэдэг Монголын манлай үйлдвэр юм” гээд харин одоо машин механизмын салбарын хөгжлийг түүчээлж, энэ чиглэлээр үйлдвэрлэгч улс болох томоохон салбарын үндэс суурийг тавихаар Эрдэнэт машин цогцолбор үйлдвэр төслийг хэрэгжүүлэхээр зорьж буйг онцлов.
Уг төсөл хэрэгжсэнээр 2500 орчим ажлын байр шинээр бий болж, 10 жилийн хугацаанд 2.5 тэрбум ам.долларын орлого олж, 328.5 сая ам.долларын цэвэр ашигтай ажиллах тооцоог хийжээ. Мөн ачааны 500 вагон, жижиг оврын ачааны машин 10000 хүртэл, автобус 500-г үйлдвэрлэх хүчин чадалтай үйлдвэрийн цогцолбор байх юм.
