Барааны тэмдгийг бүртгэхээс татгалзсан урьдчилсан шийдвэрт няцаалт гаргах нь

Брэнд нэрээ патентжуулах гэтэл татгалзсан шийдвэр авч байв уу? Бүртгэхээс татгалзсан урьдчилсан шийдвэрийг хүлээн авснаас хойш гурван сарын дотор няцаалт хийх боломжтойг Та мэдэх үү?

Оюуны өмчийн газраас барааны тэмдгийг бүртгэхээс татгалзсан шийдвэр гаргаж байгаа нь Монгол улсад аль хэдийн барааны тэмдгээ бүртгүүлсэн, оюуны өмчийн эрх эзэмшигчийн онцгой эрхийг хамгаалж буй хэрэг юм. Харин урьдчилсан шийдвэрийг хүлээн авсан мэдүүлэг гаргагч өөрийн мэдүүлсэн тэмдгийн онцгой шинж чанарыг тайлбарлан, ганцхан удаа няцаалт гаргах эрхтэй байдаг. Иймд энэхүү боломжийг алдалгүй ашиглаж, мэдүүлэг гаргагч барааны тэмдгийн мэдүүлгээ амжилттай бүртгүүлэх нь чухал юм.

2024 онд МҮХАҮТ-ын оюуны өмчийн итгэмжлэгдсэн төлөөлөгчид нь 17 барааны тэмдгийг бүртгэхээс татгалзсан урьдчилсан шийдвэр авч, няцаалт бүхий хариу тайлбар гарган амжилттай бүртгүүлжээ. Хариу тайлбарыг кэйс тус бүрд зориулан өөр өөр арга тактик ашиглан боловсруулдаг. 

Тэгвэл яагаад бүртгэхээс татгалздаг вэ?

• Барааны тэмдэг нь ялгагдах шинж чанар агуулаагүй гэж үзсэн тохиолдолд (барааны тэмдэг нь нийтлэг үг, хэллэг эсвэл хэт ерөнхий загвараас бүрдсэн);
• Барааны тэмдэг нь магтаалын шинж чанартай эсвэл өөрийн бараа, үйлчилгээний гарлыг тодорхойлсон, эсвэл шууд бараа, үйлчилгээг тайлбарласан тохиолдолд (жишээ нь аялал, жуулчлал зохион байгуулдаг үйлчилгээний салбарт “Travel agency”, “best жуулчин”, “Mongolian” зэрэг ерөнхий нэр ашиглах);
• Өмнө нь бүртгэгдсэн эсвэл бүртгүүлэхээр мэдүүлсэн барааны тэмдэгтэй ижил эсвэл төсөөтэй тохиолдолд (энд хайлт хийх шаардлага үүснэ);
• Барааны тэмдэг нь Хуулийн тодорхой заалтуудыг зөрчсөн тохиолдолд (Хуульд заасан тэмдэг, тэмдэглэгээ, улсын нэр, туг далбаа, Монгол Улсын түүхэн, нэрд гарсан хүмүүсийн нэрийг дангаар эсвэл бүтнээр ашиглах);  
• Барааны тэмдэг нь ёс суртахуунд харш бол (барааны тэмдгийн дуудлага, галиглал зэрэг нь монгол хэлэнд зохисгүй байдлаар ойлгогдохуйц);
• Барааны тэмдгийн мэдүүлэг гаргагч нь бусдын барааны тэмдгийг шударга бусаар давуу эрх эдлэх зорилгоор бүртгүүлэхээр мэдүүлсэн тохиолдолд (жишээ нь барааны тэмдэг эзэмшигчийн зөвшөөрөлгүйгээр өмнөөс нь мэдүүлэх);
• Барааны тэмдэг нь нийтэд түгээмэл болсон барааны тэмдэгтэй ижил эсвэл төсөөтэй тохиолдолд (жишээ нь: McDonald’s, Benz, Carrefour, Nokia, Casio) бүртгэхээс татгалзсан шийдвэр Оюуны өмчийн газраас гардаг.

Хариу тайлбарыг хэрхэн боловсруулах вэ?

• Урьдчилсан шийдвэрт дурдсан үндэслэлтэй сайтар танилцах (ингэхдээ татгалзсан шийдвэрийн үндэслэлээс халихгүй байх буюу шаардлагагүй илүү мэдээллийг бичихээс зайлсхий);
• Татгалзсан шалтгааныг няцааж буй үндэслэлийг тойруу бус шууд утгаар, оновчтой, тодорхой бичих;
• Холбогдох хууль тогтоомж, дүрэм журмын заалтад нийцтэй хэсгүүдийг иш татаж дурдах (Хуулийн 5.1 болон 5.2 дугаар заалтад харшлаагүй гэдгийг дурдах);
• Тэмдэг нь ялгагдах шинж чанартай, ерөнхий нэр, үг хэллэг биш болохыг тайлбарлах;
• Тэмдгийн загвар, фонт, өнгө, үг зэрэг бусдаас хэрхэн ялгагдаж байгааг дурдах;
• Тэмдэг нь өмнөх барааны тэмдгээс өөр ангилалд (бараа, үйлчилгээнд) хамаардаг бол энэ тухай тодруулах;
• Тэмдэг нь тухайн салбарт онцгой гэдгийг нотлох;
• Тэмдэг нь хэрэглэгчдэд төөрөгдөл үүсгэхгүй гэдгийг батлах;
• Тэмдгийг эрх эзэмшигчийн зөвшөөрөлтэйгөөр ашиглаж буйг нотлох;
• Шаардлагатай бол Дэлхийн Оюуны өмчийн байгууллага болон Оюуны өмчийн газрын аж үйлдвэрийн өмчийн нээлттэй мэдээллийн санг ашиглах, мөн нэмэлтээр GOOGLE хайлтыг ашиглаж болно.

Оюуны өмчийн газарт хариу тайлбарыг заасан хугацаанд хүргүүлэх:

Хуульд заасан хугацаанд буюу шийдвэрийг хүлээн авснаас хойш гурван сарын дотор Оюуны өмчийн газарт няцаалтыг хүргүүлэх. Хугацаа хэтрүүлсэн тохиолдолд барааны тэмдгийг бүртгэхээс татгалзсан тухай эцсийн шийдвэр гарахыг анхаарна уу.

Шаардлагатай тохиолдолд Маргаан шийдвэрлэх комисст хандах:

Энэ тохиолдолд хариу тайлбарт дурдсанаас илүү хүчтэй үндэслэл, нотолгоог шаардана. Комисс нь гомдол, хүсэлтийг хүлээж авснаас хойш зургаан сарын дотор хянан шийдвэрлэнэ.

Мэргэжлийн туслалцаа авах:

Хариу тайлбарыг хуулийн дагуу баримт нотолгоонд тулгуурлан бичих нь зүйтэй. Иймд оюуны өмчийн итгэмжлэгдсэн төлөөлөгчөөс мэргэжлийн туслалцаа авч няцаалт гаргах боломжийг ашиглаарай.

Нийтлэл бичсэн: С.Дугармаа
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №119

МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Email: patenttmbur@mongolchamber.mn