ҮНДЭСНИЙ ҮЙЛДВЭР ЭРХЛЭГЧДЭД ТАТВАРЫН УЯН ХАТАН БОДЛОГО, ЗОХИЦУУЛАЛТЫГ ЧИГЛҮҮЛЭХ ХЭРЭГТЭЙ БАЙНА
УИХ-ын даргын захирамжаар Татварын багц хуулийг шинэчлэх ажлын хэсэг татварын тогтолцоо, өнөөгийн нөхцөл байдал, шинэчлэл сэдвээр цуврал хэлэлцүүлэг зохион байгуулж байгаа. Энэ ажлын хүрээнд өнөөдөр жижиг дунд аж ахуйн нэгжийн төлөөллүүдтэй хэлэлцүүлэг хийв.
Хэлэлцүүлэгт “Татварын шинэчлэлийн олон улсын чиг хандлага” сэдвээр ТМЗН-ийн Тамгын газрын дарга, ТМЗ, Аудитор, Татварын шинжээч Г.Хишигзул танилцуулга хийлээ.
Тэрээр татварын хуулийг ойлгомжтой болгох, шинэчлэх, хувь хүний орлогын албан татварыг боловсронгуй болгох, нийгмийн өөрчлөлттэй илүү уялдуулах, татварын хөнгөлөлт, чөлөөлөлтийг илүү оновчтой, тодорхой асуудлыг шийдэхэд хэрэглэх аргачлал зэргийг олон улсын туршлагатай харьцуулан танилцууллаа.
Оролцогчдын зүгээс үндэсний үйлдвэрлэлийг дэмжихэд чиглэсэн төрийн бодлого, хууль эрх зүйн орчныг сайжруулахад зайлшгүй тусгах зэрэгт саналаа хэлсэн юм. Тухайлбал,татварын шинэчлэлийг хийхдээ эдийн засгийн бодлогоор бизнесийг дэмжих, аж ахуйн нэгжийн үйл ажиллагааг өргөжүүлэхэд чиглүүлэх, татварын тэгш, шударга зарчмыг хангахад чиглэсэн бодлогыг хэрэгжүүлэх шаардлагатай гэдгийг хэллээ.
Хэлэлцүүлэгт МҮХАҮТ-ын удирдлагууд, Татварын ерөнхий газар, аж ахуйн нэгжүүдийн төлөөлөл зэрэг нийт 80 орчим хүн оролцлоо.
