АЖ АХУЙН НЭГЖИЙН ОРЛОГЫН АЛБАН ТАТВАРЫН ХӨНГӨЛӨЛТ ЭДЛЭХ БҮТЭЭН БАЙГУУЛАЛТ, ТӨСӨЛ ҮЙЛ АЖИЛЛАГААНД ТАВИГДАХ ШААРДЛАГА, СТАНДАРТ СЭДВИЙН ХҮРЭЭНД ХЭЛЭЛЦҮҮЛЭГ БОЛЛОО
Хэлэлцүүлэгт Байгаль орчин, уур амьсгалын өөрчлөлтийн сайд С.Одонтуяа, МҮХАҮТ-ын Ерөнхийлөгч Л.Төр-Од болон холбогдох яамны мэргэжилтэн, ТОП-100 аж ахуйн нэгжийн төлөөллүүд оролцож саналаа солилцов.
Хэлэлцүүлгийн эхэнд Татварын ерөнхий газрын татвар төлөгчдөд үйлчлэх газрын ахлах байцаагч Б.Энхтөр “Татварын хөнгөлөлттэй холбоотой хэрэгжүүлж буй зорилт, арга хэмжээ”-ний талаар танилцууллаа.
Сайд С.Одонтуяа, Монгол улсад 2026 оны 6-р сард НҮБ-ийн цөлжилттэй тэмцэх талуудын хурал болно. Энэхүү хуралд 10 мянга гаруй зочид төлөөлөгчид оролцоно, энэ нь бизнес эрхлэгчдийн үйл ажиллагаанд сайнаар нөлөөлөхөөс гадна эдийн засаг эргэлтэд орох том боломж гэдгийг онцлон хэллээ. Яамны зүгээс агаарын бохирдол бууруулах чиглэлээр үйл ажиллагаа явуулж байгаа аж ахуйн нэгжүүдийн бараа бүтээгдэхүүнийг хямдралтай үнээр сурталчлах талаар арилжааны телевизүүд рүү албан тоотыг хүргүүлсэн байгаа. Танхим энэ чиглэлийн үйл ажиллагаа явуулж буй гишүүдээ дэмжих үүднээс сошиал болон цахим хуудсаараа дамжуулан сурталчлах ажлыг бас хийх хэрэгтэй байна. Техник, технологийн талаар яамны дэргэд эрдэмтдийн зөвлөл ажиллаж байгаа тэндээс зөвлөгөө мэдээлэл авч болно гэв. Мөн хог хаягдал, дахин боловсруулах, агаарын бохирдлыг бууруулах чиглэлийн тоног төхөөрөмж, оёдлын салбарын даавуу, туслах материалыг гаалийн татвараас бүрэн чөлөөлсөн байгаа талаар хэллээ.
МҮХАҮТ-ын Ерөнхийлөгч Л.Төр-Од: Танхимын ирэх жилүүдэд хийх бодлого үйл ажиллагааны талаар танилцуулаад, аж ахуйн нэгжүүдийг байгаль орчин, засаглалын хүрээнд ногоон санхүүжилтийн корпорацтай хамтран ажиллахыг уриаллаа.
Хэлэлцүүлгийн дараагийн илтгэлийг БОУАӨЯ-ны бодлого төлөвлөлтийн газрын Байгаль орчны салбарын стандартчиллын асуудал хариуцсан ахлах шинжээч Г.Хоролмаа, Аж ахуйн нэгжийн орлогын албан татварын хөнгөлөлт эдлэх бүтээн байгуулалт, төсөл үйл ажиллагаанд тавигдах шаардлага, стандарт сэдвээр танилцуулав.
