ЛАОСЫН БИЗНЕС ЭРХЛЭГЧИД МОНГОЛЫН АРЬС ШИР, МАХ, МОНГОЛ АРХИЙГ СОНИРХДОГ

МҮХАҮТ-ын Ерөнхийлөгч Л.Төр-Од БНЛАУ-аас Монгол Улсад суугаа Элчин сайд Хунгээн Сугсавадтай уулзалт хийж, хоёр орны эдийн засаг, бизнесийн хамтын ажиллагааны талаар ярилцав.

Хоёр орон эртний сайн найрамдалт харилцаатай бөгөөд өндөр түвшний Төрийн айлчлал 2023, 2024 онд болсон билээ. Эдгээр төрийн айлчлалын хүрээнд хийсэн Санамж бичгийг бодитой болгоход ХАҮТ-уудын хамтын ажиллагаа чухал үүрэгтэйг Элчин Сайд Хунгээн Сугсавад онцлов.

Энэ өдрүүдэд Монгол- Лаос улсын Засгийн газар хоорондын 12-р комиссын хуралдаан Лаос улсад болж байгаа билээ. Монгол Улсаас Зам тээвэр хөгжлийн сайд Б.Дэлгэрсайхан тэргүүтэй төлөөлөгчид оролцож байна. Мөн энэхүү бүрэлдэхүүнд МҮХАҮТ-ын Ерөнхийлөгч Л.Төр-Од багтаж, хоёр орны Танхимуудын ажлыг идэвхжүүлэх, бизнесийн боломжуудыг эрэлхийлэх чиглэлээр холбогдох албаны хүмүүстээ уулзах юм.

Лаос улсын бизнес эрхлэгчид Монголоос арьс шир, мах махан бүтээгдэхүүн, монгол архийг зах зээлд нийлүүлэхэд бэлэн бөгөөд Лаосын зах зээлээр дамжуулан АСЕАН-ы орнууд руу гаргах боломжтой талаар Элчин сайд Хунгээн Сугсавад ярив.

Харин Лаос улсаас кофе, цай, будаа, жимс жимсгэнэ Монголын зах зээлд нийлүүлэх боломжтой юм байна.

Уулзалтад МҮХАҮТ-ын Ерөнхий нарийн бичгийн дарга Б.Саруул оролцлоо.