МОНГОЛ, ТУРКИЙН БИЗНЕС ФОРУМ АМЖИЛТТАЙ БОЛЛОО
БНТУ-ын Истанбул хотноо Монгол-Туркийн бизнес форум боллоо. Энэхүү форумаар хоёр орны бизнес, худалдаа, хөрөнгө оруулалтын чиглэлээр хэрхэн хамтарч ажиллах боломж байгаа, ямар асуудлыг шийдэж, эрх зүйн орчин бүрдүүлэх чиглэлээр ярилцаж, санал бодлоо хуваалцсан. Тус форумыг БНТУ-ын Эдийн засгийн хамтын ажиллагааны газар буюу DEIK, МҮХАҮТ хамтран зохион байгуулав.
Монгол, Туркийн бизнес форумыг нээж Монгол Улсын Тэргүүн шадар сайд Л.Гантөмөр, МҮХАҮТ-ын Ерөнхийлөгч Л.Төр-Од, Туркийн талаас Худалдааны дэд сайд болон Гадаад эдийн засгийн хамтын ажиллагааны байгууллагын дарга нар үг хэлсэн. ЭЗХ-ийн сайд Л.Гантөмөр “Монгол Улсын бизнес, хөрөнгө оруулалтын орчин ойрын 2,3 жилд эрс өөрчлөгдөнө” гээд Туркийн бизнес эрхлэгчдийг өвөг дээдсийнхээ нутагт очиж бизнес эрхэлж, үл хөдлөх хөрөнгөтэй болж, ажиллаж амьдрахыг урилаа.
МҮХАҮТ-ын Ерөнхийлөгч Л.Төр-Од “Манай хоёр улсын гадаад худалдааны эргэлт 2024 оны байдлаар115.4 сая ам.доллар байгаа ба Турк Улс 112 сая ам.доллар буюу 97 хувь, Монгол Улс 3.4 сая ам.доллар буюу 3 хувийг тус тус эзэлж байна. Тиймээс Монголын талын худалдааны эргэлтийг нэмэгдүүлэх, тэнцвэржүүлэх, бизнес хөрөнгө оруулалтыг татахад анхаарах нь чухал” хэмээн хэлэв
Форумын эхэнд БНТУ-ын эдийн засгийн товч мэдээлэл өгсөн. Турк улсын эдийн засаг сүүлийн 18 жилийн хугацаанд 4-5 дахин өсжээ. Гадаад худалдааны экспорт 255 тэрбум ам.долларт хүрсэн. Дэлхийн эдийн засаг, үйлдвэр үйлчилгээнд эзлэх хувь 1.35 хувь. Гадаадын шууд хөрөнгө оруулалтыг татахад анхаарч ажилласаар байгаа. ДНБ 2002 онд 11000 ам.доллар байсан бол 2023 оны байдлаар 45000 ам.долларт хүрчээ. Турк улс руу хөрөнгө оруулалт хийвэл Европын холбооны хөнгөлөлт урамшуулал үзүүлнэ. Дэлхийн улс орнуудтай агаарын, төмөр замын, автозам, усан замаар холбогддог. Хүн ам өнөөдөр 88 сая, 2030 он гэхэд 92 саяд хүрэх тооцоог хийжээ. Судлаачдын тоогоор дэлхийд дээгүүрт жагсдаг. Дэлхийн банкнаас гаргадаг бизнес эрхлэлтийн индексээр 190 гаруй орноос 33 дугаар байрт жагсаж байгаа. 2003 онд компани байгуулах хугацаа сар гаруй болдог байсан бол өнөөдөр 7 хоног болсон гэдгийг онцолж байв.
Форумын дараа хоёр орны бизнес компаниудын B2B уулзалтыг мөн зохион байгуулсан. Манай бизнес эрхлэгчдийн зүгээс Туркийн эрүүл мэндийн салбарыг сонирхож буйгаа илэрхийлж, тусгайлсан уулзалтыг хийсэн юм. Энэхүү уулзалтад ЕТГ-ын эрүүл мэнд хариуцсан зөвлөх Т.Мөнхсайхан оролцож, Монголын эрүүл мэндийн салбарын талаар мэдээлэл өгч, хоёр орны бизнес эрхлэгчидтэй санал бодлоо солилцсон.
Истанбулын айлчлалын үеэр 30 гаруй тэрбум төгрөгийн мөнгөн дүн бүхий гэрээ хэлэлцээрийг амжилттай хийв.
