БИЗНЕС ХӨРӨНГӨ ОРУУЛАЛТЫН ФОРУМ ӨНӨӨДӨР БНТУ-ЫН ИСТАНБУЛ ХОТНОО ҮРГЭЛЖИЛЖ БАЙНА
Бүгд Найрамдах Турк Улсад төрийн айлчлал хийж буй Монгол Улсын Ерөнхийлөгч Ухнаагийн Хүрэлсүхийг тус улсын Ерөнхийлөгч Р.Т.Эрдоан ордон цогцолбортоо албан ёсоор угтан авлаа.
Хоёр улс 2004 оноос Иж бүрэн түншлэлийн түвшинд харилцаа, хамтын ажиллагаа өрнүүлж ирсэн бөгөөд төрийн айлчлалын үеэр харилцааны түвшнийг шат ахиулж, Стратегийн түншлэлд хүргэлээ. Ингэснээр манай улс 9 улстай Стратегийн түншлэлийн харилцаа тогтоохоос гадна харилцаа, хамтын ажиллагааг өргөжүүлэн хөгжүүлэх зорилгоор хоёр улс болон Засгийн газар, байгууллага хоорондын нийт 11 баримт бичигт гарын үсэг зурлаа.
Монгол Улсын Ерөнхийлөгчийн Төрийн айлчлалын хүрээнд Барилга, хүнс, хөдөө аж ахуй, эрүүл мэнд, уул уурхайн 100 орчим компанийн төлөөлөл энэхүү бизнесийн багт багтаж байна.
Хоёр улсын бизнесийн төлөөллүүд оролцсон бизнес хөрөнгө оруулалтын форумыг өчигдөр Анкара хотод зохион байгуулсан. Уг уулзалтад БНТУ-ын Худалдааны сайд Omer Bolat, Монгол Улсын Тэргүүн шадар сайд Л.Гантөмөр нар оролцож үг хэлсэн.
Omer Bolat хэлэхдээ “БНТУ дэлхийн 137 улсад 1200 орчим төсөл хөтөлбөр хэрэгжүүлж байна. Манай олон салбар, бизнесийн компаниуд олон улсад нэрээ гаргаж ажилладаг. Тиймээс бид Монгол Улсад өөрийн чадавхиа харуулахыг хүсч байна. Монголын компаниудтай хамтран ажиллаж, хөрөнгө оруулалт хийж, хоёр орны гадаад худалдааны хөгжилд томоохон дэвшил гаргаж ажиллана” гэв.
Монгол Улсын Тэргүүн Шадар сайд Л.Гантөмөр “Монгол Улс ойрын 2-3 жилд уул уурхайн салбарын бүтээмж, орлогыг хэд дахин нэмэгдүүлж, үйлдвэржилт, бүтээн байгуулалтын төслүүд хэрэгжүүлнэ. Манай улс Хятад, Япон, Европын зах зээлтэй холбогдсон. Зүүн өмнөд Азитай интеграцид бүрэн орж байна. БНТУ-ын бизнес, хөрөнгө оруулалтын салбарт хамтран ажиллахдаа таатай байх болно” гэлээ.
