МУИС-ТАЙ 2023 ОНД БАЙГУУЛСАН САНАМЖ БИЧГИЙГ ШИНЭЧЛЭН БОДИТ АЖИЛ БОЛГОЖ АЖИЛЛАНА
МУИС-ийн ректор, профессор Б.Очирхуяг МҮХАҮТ-ын Ерөнхийлөгч Л.Төр-Одыг урьж хүлээн авч уулзлаа. Уулзалтаар хоёр байгууллагын хамтын ажиллагааны бодлого, үйл ажиллагааны талаар санал солилцов.
Мөн байгууллагуудын хооронд 2023 онд байгуулсан Санамж бичиг, түүнийг шинэчлэн, сайжруулах ажиллах тухайд ярилцлаа. Тус уулзалтад МУИС-ийн Судалгаа, хамтын ажиллагаа эрхэлсэн проректор С.Гомбобаатар,МУИС-ийн Бизнесийн сургуулийн доктор, профессор Б.Даваасүрэн, Шинжлэх ухаан технологийн Улаанбаатар паркийн захирал О.Мөнхбат, МУИС-ийн хамтын ажиллагааны газрын дарга Ш.Мэндбаяр, ШУТУБП-ын ерөнхий менежер Н.Өлзийжаргал, мөн тус паркийн ТДТ-ийн эрхлэгч Ш.Нармандах нар оролцов.
МУИС-ийн зүгээс Шинжлэх ухаан технологийн Улаанбаатар парк төслийнхөө танилцуулгыг хийв. Шинжлэх ухаан технологийн Улаанбаатар паркийн алсын хараа нь Монгол Улсын инновац технологийн дэвшлийн гол төв болж, улс орны тогтвортой хөгжилд хувь нэмэр оруулан стартапын экосистемийг бүрдүүлэхэд чиглэж буй аж. “Их сургуулийн эрдэмтэн судлаач, багш, оюутнуудын мэдлэг шингэсэн судалгааны үр дүн, шинэ бүтээл, технологи инновацыг хөгжүүлэн нийгэм эдийн засгийн хэрэглээний эргэлтэд оруулах, улс орны өмнө тулгарч буй асуудлыг шийдвэрлэхэд их сургууль шинжлэх ухааны оролцоог нэмэгдүүлэхэд төслийн гол зорилго оршино” гэжээ.
“2023 онд байгуулсан Санамж бичгээ эргэн сэргээж, шинэчлээд энэ хүрээнд бодитой ажил хийх, тухайлбал, цаашид өндөр технологи, шинжлэх ухаан, их сургууль, практикийг хослуулан өндөр боловсрол мэдлэгтэй боловсон хүчнийг бэлдэхэд хамтран ажиллая” хэмээн МУИС-ийн ректор Б.Очирхуяг хэлэв.
Тэрбээр МҮХАҮТ нь МУИС-ийн Бизнесийн их сургуультай Монголын бизнесийн орчны судалгааг жил бүр хийсээр ирсэн. Энэ нь бизнес эрхлэгчид, төр засгийн байгууллагуудын хувьд тухайн жилийн бизнес эрхлэлтийн орчныг харах томоохон дата бааз болдгыг онцолсон. Цаашид энэхүү судалгааг өргөжүүлэх, Танхимын дэргэдэх Бизнес академи, Эдийн засгийн судалгааны газартай хамтын ажиллагаа үргэлжлүүлнэ гэв. Ойрын хугацаанд хоёр байгууллагын зүгээс, Санамж бичгийн зүйл заалтаа шинэчилж, төлөвлөгөөгөө шинээр гарган хамтарсан хэлэлцүүлэг, форум хийхээр тохирлоо.
Харин МҮХАҮТ-ын Ерөнхийлөгч Л.Төр-Од “Танхим их сургуультай тодорхой үр дүн гаргаж ажиллахад бэлэн байна. Хөдөө орон нутгийн бизнес эрхлэгчдийг чадавхжуулахад Их сургуулийн багш, судлаачидтай хамтран ажиллаж, сургалт, семинар хийе. Мөн паркийн төсөлд Танхимын зүгээс оролцоотой байж дэмжиж ажиллах боломжтой” гэв.
