МҮХАҮТ-ЫН ЕРӨНХИЙЛӨГЧ Л.ТӨР-ОД БНЭУ-ЫН БИЗНЕС ЭРХЛЭГЧИДТЭЙ ЦАХИМ УУЛЗАЛТ ХИЙЛЭЭ
МҮХАҮТ-ын Ерөнхийлөгч Л.Төр-Од БНЭУ-ын бизнесийн төлөөллүүдтэй онлайн уулзалт хийлээ. Энэхүү уулзалтад БНЭУ-аас Монгол Улсад суугаа Элчин сайд Атул Малхари Готсурве болон Энэтхэг улсын Аваада групп, Кадила эмийн үйлдвэр, ТВС Моторс, Энэтхэгийн аж үйлдвэрийн холбооны төлөөлөл оролцов.
Ерөнхийлөгч Л.Төр-Од уулзалтын эхэнд хоёр улсын бизнесийн харилцаа бүх салбарт гүнзгийрэн хөгжиж байгаад баяртай байгаагаа илэрхийлэв. Мөн тэрбээр Монгол, Энэтхэг улсуудын харилцаа, хамтын ажиллагааг өргөжүүлэн хөгжүүлэх, харилцан итгэлцэл, ойлголцлыг бэхжүүлэхэд хоёр орны бизнес эрхлэгчдийн хамтын ажиллагаа чухал үүрэг гүйцэтгэж ирснийг онцоллоо.
Энэтхэг улсын бизнес эрхлэгчдийн хувьд Монголын эдийн засаг, соёл, боловсрол, шинжлэх ухаан, эм эмнэлгийн бүтээгдэхүүн, автомашин зэрэг салбарт хамтран ажиллахад бэлэн гэдгээ тодотгов.
2025 он бол Монгол Улс, Бүгд Найрамдах Энэтхэг Улсын хооронд дипломат харилцаа тогтоосны 70 жилийн ой тохиож буй билээ. Цаашид түүхт ойн хүрээнд хоёр орны бизнес эрхлэгчидтэй салбарчилсан цахим уулзалтуудыг хийхээр боллоо.
