Жарнаар тоологдох түүх бүтээсэн Танхимын шинэ жарны түүх эхэллээ
Өнөөдөр шинэ оны ажлын эхний өдөр. Үндэсний танхимынхаа гишүүд болон Монголын бүх бизнес эрхлэгчдэдээ шинэ оны мэнд хүргэе.
2025 он бол Үндэсний танхимын хувьд онцлог жил болно. Монголын үндэсний худалдаа аж үйлдвэрийн танхимын үүсэн байгуулагдсаны 65 жилийн ой тохиож буй он цаг юм. Жарнаар тоологдох түүхийг бүтээсэн байгууллага гэдгийг тодогтгож байна.
Энэ түүхэн он руу Үндэсний Танхим шинэ ерөнхийлөгчөө сонгож, шинэ жарны түүхийг бичихээр шинэ оныг угтсан билээ. МҮХАҮТ-ын Ерөнхийлөгч бөгөөд Удирдах зөвлөлийн дарга Л.Төр-Од “2025 онд бизнес эрхлэгч бүрийн эрх ашгийг бодлогоор өмгөөлөн хамгаалж, улс орныхоо эдийн засгийг ард иргэдэд ээлтэй хөгжүүлэхэд хувийн хэвшлийн оролцоог нэмэгдүүлэх, төр засаг хийгээд хувийн хэвшлийн үр өгөөжтэй түншлэлийг хөхиүлэн дэмжиж МАНЛАЙЛАГЧ, ЧИГЛҮҮЛЭГЧ, ХОЛБОГЧ, ДЭМЖИГЧ байх чиг үүргээ хэрэгжүүлэн ажиллах болно” хэмээн шинэ оны мэндчилгээндээ хэлсэн.
Өөр нэг онцлог бол УИХ-аар бизнес эрхлэгч, Танхимтай холбоотой олон хуульд нэмэлт өөрчлөлт орохоор төлөвлөж байна. Үндэсний танхим 65 жилийнхээ ой дээр Танхимын тухай хуулиа хэлэлцүүлнэ. Мөн бизнес эрхлэгчдийн хамгийн гол асуудал болсон татвар, нийгмийн даатгалын тухай хуулиудад ААН-үүдийн саналд үндэслэн нэмэлт өөрчлөлт оруулна гэдгээ Ерөнхий сайд Л.Оюун-Эрдэнэ шинэ оны мэндчилгээндээ онцолсон. Энэ нь бизнес эрхлэгчдийн маань хувьд таатай мэдээ болсон. Харин урьдчилсан санал, хэлэлцүүлэг дээр бизнес эрхлэгчид маш идэвхтэй оролцож санал бодлоо хэлэх ёстой. Мөн түүнчлэн Хөрөнгө оруулалтын тухай хууль, Худалдааны тухай хууль, Арилжааны тухай гэх мэт бизнес эрхлэгчдийн хувьд холбоо хамааралтай хуулиудад өөрчлөлт орохоор байгаа. Энэ бүрд Танхим бизнес эрхлэгч, гишүүдийнхээ санал бодлыг төрд хүргэх үүднээс хэлэлцүүлэг уулзалт зохион байгуулж, та бүхэнтэйгээ хамтдаа өөрчлөлт шинэчлэлт хийж ажилласан жил байх болно.
Түүнчлэн Үндэсний Танхим жижиг,дунд бизнес эрхлэгчдийг дэмжих Хөрөнгө оруулалтын сантай болж, салбар танхимуудын хөгжил, хиймэл оюун ухаан, өндөр технологи, инноваци, цахимжилтад түлхүү анхаарч ажиллах стратеги баримталж ажиллах жил байна гэж үзэж буйгаа Ерөнхийлөгч Л.Төр-Од мэндчилгээндээ дурдсан болно.
