БНХАУ-ын ӨМӨЗО-ны Эрээн хотын “Хятад-Монголын цагаан сарын үзэсгэлэн” нээлтээ хийлээ
“Hiromasa Convention” үзэсгэлэнгийн компани, МҮХАҮТ хамтран жил бүр уламжлал болгон зохион байгуулдаг “Хятад-Монголын цагаан сарын үзэсгэлэн” худалдааг 2024 оны 12 сарын 28-наас 2025 оны 1-р сарын 5-ны өдрүүдэд Эрээн хотын үзэсгэлэнгийн танхимд зохион байгуулж байна.
зургаа дахь жилдээ зохион байгуулж буй энэхүү үзэсгэлэнд Монгол Улсаас 40 гаруй жижиг дунд үйлдвэрлэгч ААН-үүд арьс ширэн гутал, цүнх, ноос ноолууран нэхмэл хувцас, оёмол хувцас, дээл, үнэт эдлэл, хатаасан мах, зөгийн бал, цай, бэлэг дурсгал зэрэг олон төрлийн бүтээгдэхүүнээр оролцож байгаагаас гадна Хятад, Пакистан, Непал, Энэтхэг, Солонгос зэрэг улсаас оролцож нийт 180 гаруй ААН бараа бүтээгдэхүүнээ сурталчлан борлуулж оролцож байна.
Эрээн хотын үзэсгэлэн нь өрхийн болон жижиг дунд бизнес эрхлэгчдийн хувьд шинэ зах зээл нээх, хамтын ажиллагааг өргөжүүлэхэд хамгийн зардал багатай, ойрхон, монгол бараа бүтээгдэхүүнийг харьцангуй хэрэглэх сонирхолтой, Эрээн хот төдийгүй цаашлаад ӨМӨЗО-ны бусад хотуудад түншийн холбоо тогтоох, борлуулалтаа нэмэгдүүлэх том боломж олгодог билээ.
