Орос, Монголын бизнес форум Москва хотноо зохион байгуулагдлаа
Монгол Улсын Ерөнхий Сайд У.Хүрэлсүхийн ОХУ-д хийж буй айлчлалын хүрээнд Орос, Монголын бизнес форумыг Монгол Улсын Засгийн Газар, Евразийн Эдийн Засгийн Комисс, МҮХАҮТ болон ОХУ-ын Худалдаа Аж Үйлдвэрийн Танхим хамтран Москва хотноо зохион байгууллаа.
Бизнес форумыг нээж Монгол Улсын Ерөнхий сайд У.Хүрэлсүх, ОХУ-ын Засгийн газрын орлогч дарга А.В.Гордеев, Монгол Улсын Гадаад харилцааны сайд Д.Цогтбаатар, Евразийн Эдийн Засгийн Комиссын Интеграци ба макро эдийн засгийн зөвлөлийн гишүүн (сайд) С.Ю. Глазьев, МҮХАҮТ-ын Ерөнхийлөгч О.Амартүвшин, ЕЭА-ийн бизнесийн зөвлөлийн ажлын албаны нарийн бичгийн дарга С.A. Наумов нар үг хэллээ.
Орос-Монголын бизнес форумд Монголоос 30 аж ахуй нэгжийн 50 бизнес эрхлэгч, ОХУ-ын талаас барилга, барилгын материалын импорт, нефть, уул уурхай, эм эмнэлгийн хэрэгслийн импорт, автомашин худалдаа, баталгаажуулалт, үл хөдлөхийн түрээс, программ хангамж болон гадаад худалдааны салбарын 50 аж ахуйн нэгжийн 100 гаруй бизнес эрхлэгч оролцов.
Түүнчлэн бизнес форумын хүрээнд “Made In Mongolia” үзэсгэлэн худалдааг Монгол Улсын Засгийн газар, МҮХАҮТ хамтран зохион байгууллаа. Үзэсгэлэнд Монголын үндэсний брэнд болсон 20 компани бараа бүтээгдэхүүнээ танилцуулж сурталчиллаа.
