"Монгол Туркийн бизнес форум"-ыг үр дүнтэй, харилцан ашигтай хийх талаар санал солилцлоо
Ерөнхийлөгч У.Хүрэлсүх өнгөрсөн долдугаар сард Бүгд Найрамдах Казахстан Улсын нийслэл Астана хотноо болж буй Шанхайн хамтын ажиллагааны байгууллага (ШХАБ)-ын гишүүн орнуудын Төрийн тэргүүн нарын зөвлөлийн өргөтгөсөн хуралдаанд оролцож байх үеэрээ Бүгд Найрамдах Турк Улсын Ерөнхийлөгч Рэжэп Тайип Эрдоантай уулзсан бөгөөд Иж бүрэн түншлэлийн харилцаатай Бүгд Найрамдах Турк Улстай өрнүүлж буй харилцаанд онцгой ач холбогдол өгч, хамтын ажиллагааг эдийн засаг, нийгмийн бүх салбарт гүнзгийрүүлэх, харилцааны түншлэлээ ахиулахыг эрмэлзэж буйгаа илэрхийлсэн билээ.
Харин Бүгд Найрамдах Турк Улсын Ерөнхийлөгч Р.Т.Эрдоан ах дүүгийн харилцаатай Монгол Улстай бүх салбарт хамтран ажиллаж, харилцааг улам бүр бэхжүүлэхийг зорьж байгаагаа онцолж, өөрийн улсдаа айлчлахыг урьсан байдаг. Энэхүү төрийн дээд хэмжээний айлчлалыг ирэх оны нэгдүгээр сард хийхээр товлоод буй юм.
Энэ айлчлалын хүрээнд болох "Монгол Туркийн бизнес форум", хамтын ажиллагааны талаар ярилцах Монгол Туркийн бизнес зөвлөлийн онлайн уулзалт өнөөдөр /2024.12.16/ боллоо.
Энэхүү уулзалтад МҮХАҮТ-ын Гүйцэтгэх захирлын үүргийг түр орлон гүйцэтгэгч Ц.Магнайбаатар болон Гадаад харилцаа хамтын ажиллагааны газрын дарга Б.Жаргалсүрэн нар Истанбулын Ерөнхий консулын газрын худалдааны аттаче Д.Бат-Эрдэнэ нар оролцож, мэдээлэл солилцов. БНТУ-ын талаас Турк Улсын Элчин сайд Зафер Атеш, Монгол Улсаас Турк Улсад суугаа Онц бөгөөд Бүрэн эрхт элчин сайд Г.Мөнхбаяр, Монгол Туркийн бизнес зөвлөлийн Туркийн талын дарга Озкан Озтурк болон Туркийн бизнес эрхлэгчдийн төлөөлөл оролцлоо.
Өнөөдрөөс 20 жилийн өмнө Монгол Улсын Ерөнхийлөгч БНТУ-д айлчилж байсан юм. Харин 20 жилийн дараах энэ удаагийн төрийн айлчлал бол хоёр улс иж бүрэн түншлэл, стратегийн түншлэлийн харилцаа үүсгэх өндөр ач холбогдолтой айлчлал гэдгийг Туркийн талаас онцлоод, энэхүү онлайн хуралд маш их ач холбогдол өгч буйгаа илэрхийллээ.
Мөн Монгол Улс 2011 онд өөрийнхөө гадаад бодлогын үзэл баримтлалд БНТУ-ыг гурав дахь хөршөөрөө тодорхойлсон. Турк улсын зүгээс Монгол Улсыг ах дүүгийн найрамдалт харилцаатай улс гэж хандан, хамгийн эртний хөрш улс маань гэж үздэг. Энэ нь хоёр улсын хооронд худалдаа, эдийн засгийн харилцаа хөгжихөд маш бат бэх үндэс суурь болж байгааг онцоллоо.
Энэ үеэр МҮХАҮТ-ын Гүйцэтгэх захирлын үүргийг түр орлон гүйцэтгэгч Ц.Магнайбаатар хэлэхдээ “БНТУ-д хийх Монгол Улсын Ерөнхийлөгчийн албан ёсны айлчлалын хүрээнд зохион байгуулах Монгол Туркийн бизнес эрхлэгчдийн бизнес форум, уулзалт, холбоо тогтоох арга хэмжээнд МҮХАҮТ онцгойлон анхаарч ажиллаж байна. ГХЯ болон Ерөнхийлөгчийн Тамгын газрын Гадаад бодлого хариуцсан зөвлөхүүдтэй энэ айлчлал, бизнес форумын асуудлаар удаа дараа санал солилцсон. Энэ удаагийн бизнес айлчлалыг өмнө зохион байгуулж байсан арга хэмжээнүүдээс илүү өндөр түвшинд зохион байгуулах, хоёр талын бизнес эрхлэгчид харилцан ашигтай, бизнес саналуудаа солилцсон, үр дүнтэй айлчлал болгохын төлөө хичээж ажиллаж байна. Өнөөдрийн байдлаар МҮХАҮТ-д бизнес группт оролцож, Турк улстай хамтын ажиллагаатай байх хүсэлтэй 31 аж ахуй нэгж бүртгүүлээд байна. Монгол Улсын Ерөнхийлөгчийн санаачилсан “Хүнсний хувьсгал” болоод “Цагаан алт” хөтөлбөрүүд хэрэгжиж байгаа. Энэ хөтөлбөрүүдийг хэрэгжүүлж байгаа байгууллага, бизнесийн төлөөллүүд мөн айлчлалын бүрэлдэхүүнд нэмэгдэж орохоор байна” хэмээсэн юм.
Хоёр орны худалдааны эргэлт сүүлийн жилүүдэд гурав дахин өссөн бөгөөд шууд нислэг тогтмолжиж, нислэгийн тоо нэмэгдсэн нь иргэд хоорондын харилцаа, хэлхээ холбоог бэхжүүлэх, худалдаа, эдийн засгийн хамтын ажиллагааг өргөжүүлэхэд чухал түлхэц болж байна.
